Израелската војска изврши воздушни напади рано денес во Рафа, област во јужниот дел на појасот Газа, која е во фокусот на меѓународната загриженост заради безбедноста на палестинските цивили.
Агенцијата на Обединетите нации за помош на палестинските бегалци, вчера соопшти дека порастот на воздушните напади во Рафа ги „засили стравувањата дека тие дополнително ќе ги попречат преоптоварените хуманитарни операции“ во областа со речиси 1,5 милиони луѓе.
Министерството за здравство во Газа, управувано од Хамас, денес соопшти дека околу 100 луѓе биле убиени од израелските сили низ појасот Газа во текот на изминатиот ден, со што вкупниот број во војната достигнал 29.410 луѓе.
Израелската војска денес соопшти дека нејзините сили извршиле офанзива во област во градот Газа, во северниот дел на појасот и во западниот Кан Јунис во јужниот дел на Газа.
Во колумна во бразилски весник, координаторот за хуманитарна помош на ОН Мартин Грифитс ги повика членовите на Г20 кои се состанаа во Рио де Жанеиро оваа недела да го искористат своето политичко лидерство и влијание за да помогнат да се стави крај на војната во Газа.
„Злосторствата што ги снајдоа луѓето во Газа - и хуманитарната трагедија што ја трпат - се таму за светот да ги види, документирани од храбри палестински новинари, а премногу од нив беа убиени додека го правеа тоа“, напиша тој.
„Никој не може да се преправа дека не знае“.
Тедрос Гебрејесус, генерален директор на Светската здравствена организација (СЗО), вчера рече дека Газа „стана зона на смрт“.
„Голем дел од територијата е уништена, повеќе од 29.000 луѓе се мртви, многу повеќе се водат како исчезнати, се претпоставува дека се мртви, а многу, многу повеќе се повредени“, им рече тој на новинарите во Женева.
СЗО оваа недела соработуваше со Палестинската црвена полумесечина за да ги евакуира пациентите од опколената болница Насер во Кан Јунис во две теренски болници во јужна Газа.
Тедрос рече дека извршиле неколку итни мисии.
Израел го обвинува Хамас дека оперира во и под болницата.
Последните борби уследија по неуспехот во вторникот на Советот за безбедност на ОН да побара итен прекин на огнот, откако САД ставија вето на резолуцијата подготвена од Алжир, која имаше поддршка од 13 од 15-те членки на Советот.
„Барањето итен, безусловен прекин на огнот без договор кој бара од Хамас да ги ослободи заложниците нема да донесе траен мир“, рече за предложениот текст американската амбасадорка на САД во ОН Линда Томас-Гринфилд.
Алжир првпат го претстави својот текст на Советот пред три недели и го одложи гласањето за да им даде време на преговорите предводени од САД, Египет и Катар за ослободување на заложниците да успеат.
Но, амбасадорот на земјата рече дека молкот повеќе не е опција.
Претставникот на Израел ја нарече идејата за прекин на огнот „апсурдна“, а не магично решение.
САД предлагаат своја нацрт-резолуција, која беше претставена пред членовите на Советот за безбедност во средата, изјавија дипломати за Гласот на Америка.
Документот виден од Гласот на Америка, поддржува „привремен прекин на огнот во Газа што е можно поскоро, врз основа на формулата за ослободување на сите заложници“.
Исто така, се спротивставува на очекуваната голема израелска копнена офанзива во Рафа, велејќи дека „тоа не треба да продолжи во сегашните околности“.
Израел предупреди дека планира да изврши офанзива врз цели на Хамас во Рафа пред муслиманскиот свет месец Рамазан, доколку заложниците не се ослободат.