Најголемата организација за застапување на ЛГБТИ лицата во САД, Кампањата за човекови права, денес прогласи прва национална вонредна состојба, повикувајќи се на ширење на законодавството во сојузните држави, чија цел е регулирање на животот на квир луѓето.
Кампањата за човекови права соопшти дека над 70 нацрт-закони против ЛГБТИ луѓето биле усвоени во сојузните законодавни домови, што е двојно повеќе од претходниот рекорд од минатата година.
Биле воведени околу 525 нацрт-закони, речиси сите од републиканците, вклучително и повеќе од 220 кои ги засегаат трансродовите луѓе, соопшти Кампањата за човекови права.
Бројот на воведени закони постојано се зголемува во последниве години, зголемувајќи се од 115 во 2015 година, велат оттаму.
Како резултат на тоа, повеќе семејства со членови на ЛГБТИ биле изложени на закани, при што некои избрале да се преселат на побезбедни места, рече Кампањата за човекови права, цитирајќи податоци од истражувањето и изјави од родители.
Претседателката на Кампањата за човекови права Кели Робинсон, ги нарече Флорида, Тенеси и Тексас најнепријателски сојузни држави, велејќи дека гувернерот на Флорида Рон ДеСантис „ја злоупотребува својата позиција“.
„Овие закони се поттикнати од анти-ЛГБТИ+ републикански естаблишмент, и координирани, добро финансирани екстремистички групи како Алијансата за одбрана на слободата, фондацијата Херитиџ и Алијансата за семејна политика, инсистираат да се обидат да ги контролираат нашите семејства и животи“, рече Робинсон.
Алијансата во одбрана на слободата ја нарече изјавата на Кампањата за човекови права „клевета“, велејќи дека е посветена на верската слобода, родителските права и „светоста на животот“.
„Ниту една количина на лажни обвинувања нема да нè одврати од нашата мисија“, рече потпретседателот Џереми Тедеско.
Џереми Редферн, портпаролот на ДеСантис, рече дека ова е трик.
Дваесет сојузни држави сега ја забрануваат грижата за потврдување на полот, а 32 сојузни држави воведоа такво законодавство оваа година, рече Кампањата за човекови права.
Кампањата за човекови права ги пофали Мичиген и Минесота за проширување на правата на ЛГБТИ во 2022-2023 година.
Извор: Ројтерс
