Генералниот секретар на Обединетите нации Антонио Гутереш денес апелираше за прекин на борбите во Судан и за меѓународна поддршка за суданскиот народ, за кој рече дека се соочува со хуманитарна катастрофа.
„Помошта мора да биде дозволена во Судан и ни треба сигурен и непосреден пристап за да можеме да ја дистрибуираме до луѓето на кои им е најпотребна“, рече Гутереш за време на прес-конференција во Најроби, Кенија.
„Цивилите и цивилната инфраструктура мора да бидат заштитени, а хуманитарните работници и нивните средства мора да се почитуваат“.
Суданското министерство за здравство соопшти дека над 500 луѓе се убиени, а речиси 5.000 се ранети од почетокот на борбите на 15 април, за време на борбата за власт меѓу водачите на суданските владини сили и паравоените сили за брза поддршка.
Меѓународната организација за миграција на ОН оваа недела соопшти дека најмалку 334.000 луѓе се внатрешно раселени поради борбите, покрај 100.000 кои ја напуштиле земјата.
Агенцијата предупреди дека борбите би можеле да предизвикаат повеќе од 800.000 луѓе да избегаат од североисточната африканска земја.
Многумина одат во седумте земји што граничат со Судан, вклучувајќи ги Чад, Јужен Судан, Централноафриканската Република, Египет и Етиопија.
Мајкл Атит во Картум, Ентони Лабруто, Џон Танза и Најки Чинг од Стејт департментот придонесоа за овој извештај. Некои информации се од Асошиетед прес, Ројтерс и Франс-прес
