Украинскиот министер за одбрана Рустем Умеров рече дека сојузниците кои се собираат денес во Брисел ќе разговараат за снабдување со воена помош за Украина, вклучително и забрзување на испораката на клучното оружје, како што се системите за противвоздушна одбрана.
Коментарите на Умеров дојдоа пред последниот состанок на контакт групата за одбрана на Украина - 50 нации кои ги координираа испораките за украинската војска од руската инвазија во 2022 година.
Умеров рече дека разговорите денес ќе вклучуваат и инвестиции во одбранбената индустрија на Украина и партнерства за проекти со европските партнери.
Британскиот министер за одбрана Џон Хили првпат го води состанокот, по претходните сесии предводени од шефот на одбраната на САД.
„Ќе ја засилиме поддршката за Украина, ќе го зајакнеме одвраќањето преку НАТО и ќе обезбедиме мир преку сила“, рече Хили на Икс.
Новиот американски секретар за одбрана Пит Хегсет треба да се обрати на состанокот во седиштето на НАТО, каде Хегсет рече дека ќе се заложи за сојузниците да ги зголемат нивните трошоци за одбрана.
„Нашата посветеност е јасна: НАТО мора да биде посилна, посмртоносна сила, а не дипломатски клуб. Време е сојузниците да одговорат на ситуацијата“, рече Хегсет во средата на Икс.
Украина ќе остане во фокусот в петок, при што се очекува американскиот потпретседател Џеј-Ди Венс да се сретне со украинскиот претседател Володимир Зеленски на Минхенската безбедносна конференција.
Некои информации во текстот се од агенцијата Франс прес и Ројтерс
