Обединетите нации (ОН) велат дека појасот Газа е „најопасното место во светот да се биде дете“ како што израелското воено бомбардирање на територијата убива и рани илјадници деца, а илјадници други страдаат од заразни болести и недостаток на храна, вода и медицина во преполни, нехигиенски болници и засолништа.
„Бесен сум што оние со моќ креваат раменици додека овој хуманитарен кошмар се случува на милион деца“, изјави Џејмс Елдер, портпарол на УНИЦЕФ.
Елдер, кој неодамна се врати од двонеделна мисија во Газа, рече:
„Бесен сум што децата кои се опоравуваат од ампутации се бомбардирани и убиени во болницата Насер. Бесен сум што толку многу деца што ги сретнав не можат да тагуваат за нивната убиена мајка, татко и семејство“, рече тој.
Според Министерството за здравство на Газа, повеќе од 19.400 Палестинци се убиени, од кои околу 70% се жени и деца, откако Израел почна со бомбардирањето и опсадата на енклавата како одговор на нападите на Хамас и другите вооружени групи на 7 октомври, кои уби повеќе од 1.200 војници и цивили во Израел.
Елдер рече дека болницата Ал Насер во Кан Јунис во јужниот дел на Газа била погодена од гранати двапати во изминатите 48 часа, истакнувајќи дека болницата засолнила голем број тешко повредени деца, како и стотици жени и деца кои бараат безбедност.
„Тие не се безбедни во болниците. Не се безбедни во засолништата. И сигурно не се безбедни во таканаречените безбедни зони“.
Тој ги опиша овие зони како мали делови од пуста земја без вода, без капацитети, без засолниште од студот и дождот, со недоволни медицински капацитети, храна и вода, и критично, „без санитарни услови“.
„Во моментов во Газа има во просек околу еден тоалет за 700 деца и семејства“, рече тој.
„Без вода и санитација, ниту засолниште, овие таканаречени безбедни зони станаа зони на болести“, додаде тој.
Родителите повеќе не ги гледаат болниците како опција за нивните болни и ранети деца, додаде тој, бидејќи објектите често се погодени од воздушни напади.
Светската здравствена организација објави дека само осум од 36 болници во Газа „едвај функционираат“.
Според Канцеларијата на ОН за координација на хуманитарни прашања, најголемата болница во северниот дел на Газа, Ал Шифа, била повторно погодена во понеделникот рано наутро, при што наводно загинале пет лица, меѓу кои и деца.
