САД и Бугарија го одржаа вториот стратешки дијалог на високо ниво на кој разговараа за билатерални, регионални и глобални прашања од приоритетно значење за двете земји, соопшти Стејт департментот.
Дијалогот се совпадна со 120-годишнината од почетокот на дипломатските односи меѓу двете држави.
„Заедно ја одбележавме таа пресвртница како пријатели, сојузници и партнери. Остануваме фокусирани на унапредување на следните приоритети: заеднички пристапи кон глобалните и регионалните прашања“, се вели во изјавата.
Двете влади изјавија дека „стоиме одлучно обединети во поддршката на Украина“.
„Неиспровоцираната и неоправдана војна на Русија против Украина грубо го крши меѓународното право, го загрозува меѓународниот поредок заснован на правила и ја поткопува стабилноста на Европа, вклучително и безбедноста на регионот на Црното Море. Ја споделуваме целта за безбеден, просперитетен и меѓусебно поврзан црноморски регион кој е ослободен од закани за територијалниот интегритет, економска принуда и злонамерно влијание“, вели Стејт департментот.
Истакнувајќи ја стратешката позиција на Бугарија во регионот и во рамките на НАТО, го зголемуваме нашето одбранбено партнерство за да ја подобриме безбедноста на Балканот и регионот на Црното Море, вклучително и преку нашето заедничко учество во мултинационалната борбена група на НАТО чиј домаќин е Бугарија, пишува во соопштението.
„Ги нагласивме и нашите континуирани напори за зајакнување на владеењето на правото и обезбедување независност на судството и имаме намера да продолжиме со заедничките напори за искоренување на злото на трговијата со луѓе“, изјавија двете влади, најавувајќи проширување на билатералните врски преку академски, културни и професионални размени.
Минатата недела САД и Бугарија одбележаа 120 години дипломатски односи меѓу двете земји.
„Ние продолжуваме да ја продлабочуваме нашата соработка за виталните регионални и глобални безбедносни прашања како сојузници на НАТО, работејќи рамо до рамо во борбената група на НАТО чиј домаќин е Бугарија и редовно обучуваме заедно“, изјави тогаш портпаролот на Стејт департментот Метју Милер.
