Украинскиот претседател Володимир Зеленски денес изјави дека руските сили ја нападнале неговата земја со повеќе од 70 проектили и дека целите ја вклучуваат енергетската инфраструктура на Украина.
„Денес Путин намерно го избра Божиќ за напад. Што може да биде понехумано?“, рече Зеленски.
Украинската војска соопшти дека соборила 59 од проектилите, како и 54 од 106 беспилотни летала што Русија ги користела во своите напади.
Мета на беспилотните летала и проектилите биле енергетски објекти во повеќе региони, соопшти украинското воздухопловство.
Руското министерство за одбрана соопшти дека нападнало критични објекти за енергетска инфраструктура што ја поддржуваат украинската војска.
Во североисточна Украина, градоначалникот на Харков Игор Терехов, рече дека градот бил под „масовен ракетен напад“, а подоцна бил погоден со руски дрон.
Олег Синиехубов, регионалниот гувернер, рече дека нападите ја оштетиле цивилната инфраструктура и повредиле најмалку шест лица.
Најголемата украинска приватна енергетска компанија соопшти дека руските проектили предизвикале „сериозна штета“ и принудиле прекини на струја во Днепропетровск, Одеса и Киев.
„Во нападот насочен кон милиони Украинци кои едноставно сакаа да го прослават светиот ден, Русија предизвика сериозна штета на постројките за топлинско производство на DTEK“, се вели во соопштението на компанијата.
Руското министерство за одбрана соопшти дека нејзината противвоздушна одбрана уништила 58 украински воздушни беспилотни летала, број што е поголем од типичниот во секојдневната размена на напади со беспилотни летала меѓу двете страни.
Министерството соопшти дека 26 од пресретнувањата се случиле над регионот Белгород и 23 над Воронеж, а други дронови биле соборени над Курск, Брјанск, Тамбов и Азовското Море.
Официјални лица во Курск соопштија дека во украинското гранатирање во регионот загинале најмалку три лица.
Гувернерот на Воронеж Александар Гусев, на Телеграм изјави дека украинските напади оштетиле неколку куќи и далновод.
Некои информации во текстот се од агенцијата Франс-прес и Ројтерс
