Рускиот претседател Владимир Путин беше во посета на Монголија денес без знаци дека земјата домаќин ќе одговори на повиците за негово апсење, по меѓународната потерница за наводни воени злосторства кои произлегуваат од руската инвазија на Украина.
Патувањето е прво на Путин во земја-членка на Меѓународниот кривичен суд (МКС), откако судот тој го издаде налогот пред околу 18 месеци.
Пред неговата посета, Украина ја повика Монголија да го предаде Путин на судот во Хаг, а Европската Унија изрази загриженост дека Монголија можеби нема да го изврши налогот.
Портпаролот на Путин минатата недела рече дека Кремљ не е загрижен.
Налогот ја става монголската Влада во тешка позиција.
Земји-членките се обврзани со основачкиот договор на МКС, Римскиот статут, да ги приведат осомничените доколку е издаден налог за апсење.
Но, Монголија, земја без излез на море, која се граничи со Русија, е многу зависна од својот многу поголем сосед за гориво и дел од својата електрична енергија.
На судот му недостасува механизам за извршување на налозите.
Рускиот лидер беше пречекан на главниот плоштад во главниот град, од почесна гарда облечена во живописни црвени и сини униформи, стилизирани на униформите на личната гарда на основачот на Монголската империја.
Мала група демонстранти кои се обидоа да го развијат украинското знаме пред церемонијата за пречек, беа однесени од полицијата.
Седејќи на разговори со монголскиот претседател, Путин рече дека односите меѓу нивните две земји „се развиваат во сите области“.
Тој го покани монголскиот претседател да присуствува на самитот на земјите на БРИКС - група која меѓу другите ги вклучува Русија и Кина - во рускиот град Казан кон крајот на октомври.
Монголскиот претседател прифатил, според руската државна новинска агенција РИА Новости.
МКС го обвини Путин дека е одговорен за киднапирањата на деца од Украина, каде што борбите беснеат веќе две и пол години.
Во понеделникот, ЕУ изрази загриженост дека налогот на МКС можеби нема да биде извршен и рече дека ја споделила својата загриженост со монголските власти.
„Монголија, како и сите други земји, има право да ги развива своите меѓународни врски според сопствените интереси“, рече Европската комисија.
Повеќе од 50 Руси надвор од земјата потпишаа отворено писмо во кое ја повикуваат владата на Монголија „веднаш да го приведе Владимир Путин по неговото пристигнување“.
Меѓу потписниците е Владимир Кара-Мурза, кој беше ослободен од руски затвор во август во најголемата размена на затвореници Исток-Запад од Студената војна.
Дмитриј Медведев, заменик-секретарот на Советот за безбедност на Русија, го осуди налогот против Путин како „незаконски“ во изјава на интернет денес.
Путин направи низа прекуокеански патувања во последниве месеци за да се обиде да се спротивстави на меѓународната изолација со која се соочува поради инвазијата на Украина.
Тој ја посети Кина во мај, патуваше во Северна Кореја и Виетнам во јуни, и отиде во Казахстан во јули на состанок на Шангајската организација за соработка.
Минатата година, тој се приклучи на состанокот во Јоханесбург преку видеоврска, откако јужноафриканската влада лобираше против неговото појавување на самитот на БРИКС.
Јужна Африка, член на МКС, беше осудена од активистите и нејзината главна опозициска партија во 2015 година кога не го уапси тогашниот судански претседател за време на посетата.
