Израелскиот премиер Бенјамин Нетанјаху денес изјави дека има целосна поддршка од САД за тековната копнена офанзива во Газа против милитантите на Хамас, а во исто време, двете земји остануваат одлучни против растечките меѓународни повици за прекин на огнот.
„Многу ја ценам американската поддршка за уништување на Хамас и враќање на (околу 140 преостанати) заложници, заробени од Хамас за време на неговиот напад на 7 октомври во кој загинаа околу 1.200 луѓе во јужен Израел“, рече израелскиот лидер.
„По интензивниот дијалог со претседателот Бајден и неговиот тим, добивме целосна поддршка за копнениот напад и блокирањето на меѓународниот притисок да се запре војната“, рече Нетанјаху.
Но, Нетанјаху призна дека тој и Бајден не се согласуваат за „денот по Хамас“, кога ќе заврши војната. „Се надевам дека и овде ќе постигнеме договор“.
На настанот за реизборна кампања во САД, Бајден рече дека Нетанјаху треба да „донесе тешка одлука“, истакнувајќи дека „ова е најконзервативната влада во историјата на Израел“ и „не сака решение со две држави“ со независни израелски и палестински влади.
Американскиот лидер рече дека Израел почнува да ја губи поддршката ширум светот, а Нетанјаху „мора да ја зајакне и промени“ израелската влада за да најде долгорочно решение за израелско-палестинскиот конфликт.
Бајден предложи палестинската управа поддржана од Западот под претседателот Махмуд Абас да ја преземе контролата врз Газа и окупираниот од Израел Западниот Брег по војната.
Но, Нетанјаху рече: „Би сакал да го разјаснам мојот став: нема да дозволам Израел да ја повтори грешката од Осло“, без да појасни на која грешка мислеше во врска со договорите од 1993 година со кои беше воспоставена ограничена палестинска автономија на Западниот Брег и Газа, но не води, како што некои замислуваа во тоа време, до создавање на независна палестинска држава.
Изјавата на Нетанјаху во која се прогласува континуирана поддршка на САД дојде кога Генералното собрание на ОН требаше да одржи итен состанок денес за да расправа за нацрт-резолуцијата со која се бара итен хуманитарен прекин на огнот во Газа, на што се противат САД и
Резолуцијата изразува „голема загриженост поради катастрофалната хуманитарна ситуација во појасот Газа и страдањата на палестинското цивилно население“ и ја нагласува потребата да се заштитат и израелските и палестинските цивили според меѓународното право.
Слична резолуција пропадна во Советот за безбедност на ОН минатата недела поради американското вето.
Портпаролот на американскиот Стејт департмент Метју Милер го објасни американското противење на резолуцијата на Советот за безбедност додека ги брифираше новинарите во понеделникот.
„Јасно кажавме дека иако поддржуваме хуманитарни паузи, мислиме дека прекинот на огнот ќе му овозможи на раководството на Хамас, кое го заговараше и планираше 7 октомври, да продолжи во Газа и да планира идни напади. Тоа е неприфатливо“, рече Милер.
За време на седумдневната пауза во борбите што завршија пред повеќе од една недела, Хамас ослободи околу 100 заложници што ги зароби на 7 октомври за време на неговиот терористички напад врз Израел во кој загинаа 1.200 луѓе.
Израелската армија во вторникот соопшти дека за време на операцијата во Газа, ги пронашла телата на уште двајца заложници.
Борбите протераа околу 1,9 милиони луѓе од своите домови во Газа, а многумина бараат засолниште на југ во преполнети објекти поради предупредувањата за лошите санитарни услови и заканата од зголемување на заразните болести.
Дописниците на Обединетите нации Маргарет Бешир и на Стејт департментот Најки Чинг придонесоа за овој извештај. Некои материјали во овој извештај дојдоа од Асошиетед прес, Ројтерс и агенцијата Франс-прес
