Израелскиот премиер Бенјамин Нетанјаху денес изјави дека Израел ќе продолжи со својата воена кампања во Рафа во јужниот дел на појасот Газа, во услови на зголемен меѓународен притисок.
Израел се соочува со повици да не влегува во Рафа, една од последните релативно безбедни области, каде што 1,5 милиони луѓе побарале засолниште.
„Ќе ја завршиме работата во Рафа овозможувајќи му на цивилното население да се извлече од опасноста“, рече Нетанјаху во видеообраќањето на конференцијата на произраелската организација АИПАК во Вашингтон.
Коментарите на Нетанјаху уследија како што лидерите на Европската Унија планираат да го повикаат Израел да не започнува копнена операција во Рафа, според нацрт-заклучоците од претстојниот самит.
„Европскиот совет ја повикува израелската влада да се воздржи од копнена операција во Рафа, каде што повеќе од еден милион Палестинци во моментов бараат безбедност од борбите и пристап до хуманитарна помош“, се вели во нацрт-текстот на заклучоците што ги видел Ројтерс.
Текстот на заклучоците ќе бара одобрение од сите 27 национални лидери на ЕУ за да биде усвоен на самитот на 21 и 22 март.
Американскиот претседател Џо Бајден во саботата изјави дека Нетанјаху „повеќе го повредува Израел отколку што му помага“ со тоа што ја води војната на начин спротивен на вредностите на земјата.
