Во живо: Претседателот Обама доби втор мандат

Милиони гласачи во земјата веќе гласаа според правилата за рано гласање, но големото мнозинство на електоратот ќе излезе на гласачки места во вторник, во училишта, пожарникарски станици, цркви и на други места.

Претседателот Барак Обама и републиканецот Мит Ромни во понеделникот крстосуваа низ неколку клучни сојузни држави, во последен обид да ги убедат преостанатите неопределени гласачи.

Обама имаше застанувања во Висконсин и Охајо, пред да го има последниот собир во Ајова, државата која му ја даде првата победа во прелиминарните избори во историската изборна година 2008-ма, кога се кандидираше за Белата куќа. Претседателот ги истакна своите достигнувања за време на првиот мандат вклучувајќи ја помошта за спас на американската автомобилска индустрија и убиството на Осама бин Ладен, но кажа дека му треба уште еден мандат да ја комплетира агендата.

Ромни доцна синоќа имаше собир во Њу Хемпшир, каде ја започна кампањата пред повеќе од една година, по појавувања во Флорида, Вирџинија и Охајо. Поранешниот гувернер на Масачусетс рече дека неговото искуство како успешен бизнисмен и политичар покажува дека тој, а не Обама, ќе донесе вистинска промена за нацијата.

Потпретседателот Џо Бајден гласаше во Делавер и изјави дека „се чувствува одлично“.