Администрацијата на претседателот Џо Бајден денес соопшти дека постигнала договор со компанијата „Модерна“ за купување на 66 милиони дози од следната генерација на вакцини против ковид-19, која е адаптирана на високо преносливата омикронска варијанта, што е доволно за снабдување оваа зима на сите кои сакаат надграден засилувач, објави Асошиетед прес.
Ваквата одлука следи откако минатиот месец федералната влада изјави дека обезбедила 105 милиони дози слична вакцина од производителот „Фајзер“.
Двете нарачки се закажани за испорака во есен и зима, под претпоставка дека регулаторите ќе ја потпишат нивната ефикасност.
Пентагон соопшти дека договорот со „Модерна“ е вреден 1,74 милијарди долари.
Омикрон е доминантна варијанта на ковид во САД од декември, при што подваријантата BA.5 сега предизвикува огромен бран инфекции низ целата земја, од која се зарази и претседателот Џо Бајден.
„Мораме да останеме будни во нашата борба против ковид-19 и да продолжиме да го зголемуваме пристапот на Американците до најдобрите вакцини и третмани“, рече во изјавата секретарот за здравство и човечки услуги Ксавиер Бесера.
„Додека гледаме кон есента и зимата, ние го правиме токму тоа - осигурувајќи дека Американците ги имаат потребните алатки за да останат безбедни и да помогнат нашата нација да продолжи напред“.
Нарачките на САД од „Фајзер“ и „Модерна“ вклучуваат опции за купување по 300 милиони дози, но за постигнување на тој износ ќе бидат потребни повеќе средства од Конгресот, рече администрацијата на Бајден.
Околу 261 милион Американци примиле најмалку една вакцина против ковид-19, но само 108 милиони примиле бустер.
