Белата куќа најави дека ќе обезбеди достапност на вакцини, бустери, третмани и тестирања за ковид-19, како што брзо се шири подваријанта на омикрон БА.5, која сега стана доминантна во САД.
„Во моментов, многу Американци се недоволно вакцинирани“, рече д-р Рошел Валенски, директорка на Центрите за контрола и превенција на болести на САД (ЦДЦ), која рече дека вакцинирањето против ковид-19 обезбедува најдобра заштита од тешки исходи.
Подваријантата, за која ЦДЦ вели дека сочинува 65 проценти од варијантите кои циркулираат во САД, најверојатно може полесно да се шири и покрај вакцинацијата или природниот имунитет.
Главниот советник на американскиот претседател Џо Бајден, д-р Ентони Фаучи, рече дека подваријантата не предизвикува потешка болест или хоспитализација во споредба со другите подваријанти.
„Варијантите ќе продолжат да се појавуваат. Вирусот циркулира глобално и во оваа земја. Не треба да дозволиме да ги наруши нашите животи, но не можеме да негираме дека тоа е реалност со која треба да се справиме“, рече Фаучи.
Белата куќа вели дека ќе се фокусира на засилувачи, тестирање дома, ставање на располагање добри маски и поддршка на луѓето кои се со намален имунитет.
„Можеме да спречиме сериозни болести; можеме да ги држиме луѓето надвор од болница, а особено надвор од одделенијата за итни слуачи. Можеме да спасиме животи и можеме да ги минимизираме нарушувањата предизвикани од ковид-19. Дури во услови на BA.5, алатките што се на располагање продолжуваат да функционираат“, рече Ашиш Џа, координатор за одговор на ковид-19 во Белата куќа.
„Ние сме во точка на пандемијата каде што повеќето смртни случаи од ковид-19 може да се спречат“, рече тој.
Дел од информациите во овој текст се преземени од Асошиетед прес и Ројтерс
