Независен комитет од експерти на Светската здравствена организација (СЗО) вели дека ширењето на мајмунските сипаници во голем број земји ширум светот е загрижувачко, но не претставува вонредна здравствена состојба од меѓународна загриженост.
На почетокот на мај, СЗО беше известена за појава на мајмунски сипаници во земји надвор од Африка, каде што оваа смртоносна болест циркулира со децении.
Оттогаш, повеќе од 3.200 потврдени случаи и една смрт се пријавени во повеќе од 50 неафрикански земји. Ова предизвика тревога бидејќи, досега, само спорадични случаи на мајмунски сипаници се случиле надвор од Африка.
Генералниот директор на СЗО Тедрос Аданом Гебрејесус ја нарекува сегашната епидемија како закана за здравјето што се развива, истакнувајќи го брзото ширење на болеста во нови земји и региони. Тој вели дека комитетот се согласил повторно да свика уште еден итен состанок доколку е соодветно.
СЗО, за Гласот на Америка, рече дека подготвила листа на фактори кои би можеле да предизвикаат повторна проценка на настанот.
„Доказ за зголемување на стапката на раст на случаи пријавени во следните 21 ден, вклучувајќи значително ширење во и во дополнителни земји“, изјавија оттаму.
Мајмунските сипаници се ретка болест слична на сипаниците. Вирусот предизвикува осип и симптоми слични на грип. Се шири главно преку човечки контакт со заразени глодари, но понекогаш може да се пренесе преку контакт кожа на кожа со заразено лице.
