Заменик-генералниот секретар на НАТО Мирча Џоана ја предупреди Кина да не ѝ дава воена поддршка на Москва додека Русија продолжува со својата брутална и нелегална инвазија.
„Сè уште не видовме знаци дека Кина испорачува воено оружје за да ѝ помогне на Русија, но знаеме дека се водат дискусии“, изјави тој во интервју за Гласот на Америка во петокот.
„Ова ќе биде многу, многу сериозна одлука на Кина што ќе влијае не само на нивниот однос со нас, туку и на угледот на Кина и на остатокот од светот“.
Џоана рече дека Русија е „агресорот“ во војната во Украина, а вооружувањето на Москва е „нешто што го осудуваме многу силно“.
Портпаролот на Пентагон, бригадниот генерал Пет Рајдер денес рече дека САД ѝ соопштиле на Кина за „негативните последици од обезбедувањето смртоносна помош за Русија“.
Во април, одговарајќи на постојаната загриженост на Западот дека Пекинг ќе обезбеди воена помош за Русија, Кинеското министерство за надворешни работи рече дека Кина нема да продава оружје на ниту една страна во војната во Украина.
Џоана, кој го поддржува пристапот на Украина во НАТО, изјави за Гласот на Америка дека земјите како Украина и Грузија не треба „да имаат вето од надворешна сила како Русија за нивната сопствена судбина“.