Некои заложници што ги држи Хамас во појасот Газа по нападот на милитантната група врз Израел минатиот месец, би можеле да бидат ослободени уште в четврток, по договорот објавен од Катар, кој вклучува израелски сили да ги прекинат нападите врз Газа за четири дена.
Катар соопшти дека Хамас ќе ослободи 50 жени и деца, додека Израел, исто така, ќе ослободи „голем број на палестински жени и деца приведени во израелските затвори“.
Договорот објавен рано денес дојде по неколкунеделни преговори предводени од Катар, САД и Египет, според висок претставник на американската администрација.
Американскиот функционер рече дека меѓу заложниците кои ќе ги ослободи Хамас се очекува да има и неколку Американци.
„Им благодарам на шеикот Тамим бин Хамад Ал-Тани од Катар и на претседателот Абдел-Фатах Ел-Сиси од Египет за нивното критичко лидерство и партнерство во постигнувањето на овој договор“, рече американскиот претседател Џо Бајден во изјавата.
„И ја ценам посветеноста што премиерот Нетанјаху и неговата влада ја презедоа во поддршката на продолжената пауза за да се обезбеди дека овој договор може целосно да се спроведе и да осигура обезбедување дополнителна хуманитарна помош за да се олесни страдањето на невините палестински семејства во Газа“.
Израел ја започна својата воена кампања за уништување на Хамас откако борците на Хамас преминаа во јужен Израел на 7 октомври.
Израел соопшти дека 1.200 луѓе биле убиени, а околу 240 заробени во терористичкиот напад.
Здравствените власти во Газа соопштија дека повеќе од 12.000 Палестинци, меѓу кои најмалку 5.000 деца, се потврдени убиени во израелската воена офанзива во појасот Газа.
Почетокот на израелската пауза во борбите треба да биде објавен до четврток и може да биде продолжен по почетниот четиридневен период, соопшти Катар.
Во соопштението на израелската влада се вели дека ќе биде додаден дополнителен ден на паузата за секои дополнителни 10 заложници што ќе ги ослободи Хамас.
Високиот претставник на американската администрација рече дека повеќе од 50 жени и деца се меѓу заложниците и дека на крајот целта е да се извлечат сите заложници од Газа.
Израелскиот премиер Бенјамин Нетанјаху вети дека ќе ги врати сите заложници, истовремено повторувајќи им на членовите на кабинетот дека целта на Израел е да го елиминира Хамас и да се осигура дека милитантната група повеќе не може да му се заканува на Израел.
Израелската пауза во борбите ќе овозможи повеќе хуманитарни конвои да донесат помош во Газа, вклучително и гориво за хуманитарни напори, рече Катар.
Нивото на помош што стигнува до Газа е сериозно ограничено во споредба со она што стигнуваше до енклавата пред почетокот на конфликтот.
Канцеларијата на ОН за координација на хуманитарни прашања соопшти дека 79 камиони стигнале до палестинската енклава во вторникот, со што вкупниот број во текот на изминатиот месец достигна 1.399 камиони со помош.
Агенцијата соопшти дека во просек по 10.000 камиони со комерцијални и хуманитарни стоки стигнувале во Газа секој месец пред конфликтот.
Обединетите нации соопштија дека повеќе од 1,7 милиони луѓе се раселени во Газа, вклучувајќи 930.000 луѓе кои престојуваат во засолништа со прекумерен капацитет управувани од ОН.
Шефот за надворешна политика на Европската Унија Жозеп Борел, го поздрави договорот и повика на ослободување на сите заложници кои ги држи Хамас.
„Хуманитарната пауза мора да се искористи за да се обезбеди колку што е можно повеќе итно потребна помош за цивилите кои ја поднесуваат разорната војна во Газа“, рече Борел во изјавата.
Портпаролот на Кремљ Дмитриј Песков, договорот го нарече „прва добра вест“ по долго време во врска со конфликтот.
Британскиот министер за надворешни работи Дејвид Камерон го поздрави договорот како „клучен чекор кон обезбедување помош за семејствата на заложниците и решавање на хуманитарната криза во Газа“.
Некои информации во текстот се од Асошиетед прес и Ројтерс