Премиерот и честитал на Радмила Шекеринска за нејзното назначување за заменик-генерален секретар на НАТО, нешто за што вчера информираше Алијансата.
Но, за овој чекор на Мицкоски, владата официјално не прати соопштение, туку самиот премиер тоа денеска го кажа во одговор на новинарско прашање поставено токму за оваа тема зашто во јавноста беше забележливо отстуството на честитики од актуелниот државно-политички врв на земјата за именување на македонски политичар на толку висока меѓународна позиција.
Your browser doesn’t support HTML5
Мицкоски и честитал на Шекеринска за изборот за НАТО
Премиерот, кој со години ја сметаше Шекеринска за политички опонент, денеска обелодени дека неговата влада застанала зад нејзиниот избор за втор човек во НАТО.
За нас националното единство и интересите се пред партиските интереси и да се има Македонка за заменик-генерален секретар во најмоќната и најдобро организираната алијанса во историјата е навистина чест.Мицкоски, премиер на Северна Македонија
„Ние, како Влада не само што ја поддржавме кандидатурата на Радмила Шекеринска, туку и активно разговаравме со нашите сојузници. За нас националното единство и интересите се пред партиските интереси и да се има Македонка за заменик-генерален секретар во најмоќната и најдобро организираната Алијанса во историјата е навистина чест. И тука немавме дилема, и добро е што успешно се заврши. Во текот на вчерашниот ден се слушнав со Радмила Шекеринска, разговаравме, и нема дилема дека треба заедно да соработуваме и треба да направиме се што е во наша моќ да помогнеме на македонската Армија, а со тоа да помогнеме и за безбедноста и сето она кое што им е потребно на македонските граѓани.“, изјави Христијан Мицкоски, премиер на Северна Македонија.
Мицкоски уверува дека немало дилема дека треба да застанат зад кандидатурата на Шекеринска и покрај политичките и како што ги нарече, концептуални разлики со неа и со нејзината партија СДСМ.
„Како Влада имавме предизвик за одлуката кого и како да го поддржиме за заменик-генерален секретар на НАТО, бидејќи имаше кандидати од неколку земји. Ние немавме никаква дилема тука, бидејќи честопати повикуваме на единство и на дијалог со опозицијата, но ако тоа не го правиме на дело, а повикуваме, тогаш тоа е лицемерие.“, изјави Христијан Мицкоски, премиер на Северна Македонија.
Засега, од кабинетот на претседателката Гордана Сиљановска-Давкова нема официјална информација дали шефицата на државата и честитала на Шекеринска, за што денеска реагираа од опозицијата велејќи дека „ ВМРО-ДПМНЕ и Гордана Сиљановска-Давкова решиле да останат заглавени во сопствената малодушност.“
Инетерсно е дека меѓу честитки кои стигнаа вчера е и онаа од бугарскиот претседател Румен Радев, кој рече дека го очекува придонесот на Шекеринска во зајакнување на колективната одбрана и безбедност на Алијансата.
Шекеринска, денеска, заблагодарувајќи се на сите честитки, порача дека со нејзиното именување на оваа функција, таа ќе ја претставува и Северна Македонија.
„Пред мене е одговорност која бара целосна посветеност и работа на теми кои се клучни за глобалната безбедност и стабилност. Ќе продолжам да се залагам за вредности кои го зацврстуваат мирот, соработката и интеграцијата меѓу земјите членки на НАТО, но и да ја претставувам Северна Македонија со гордост на оваа висока меѓународна позиција. Секој ваш збор на поддршка е и потсетник дека успехот не е само личен, туку е и успех за нашата држава“, напиша Шекеринска на Фејсбук.
Долгогодишната политичарка, поранешна вицепремиерка и министерка, ќе му биде заменичката на тазе избраниот генерален секретар на НАТО, Марк Руте, кој го презема раководењето со Алијансата во еден од најтешките и најтензични периоди за Европа, но и за светот, по завршувањето на Студената војна.