Украинскиот претседател Володимир Зеленски ќе се сретне со највисоките американски законодавци, со шефицата на Меѓународниот монетарен фонд (ММФ) и со американскиот претседател Џо Бајден за време на неговата посета на Вашингтон оваа недела.
Зеленски пристигна во Вашингтон денес, велејќи дека се надева оти сè уште ќе смета на поддршката на САД поради прашањата за идната воена помош.
Тој, исто така, се среќава со директорката на ММФ Кристалина Георгиева, истиот ден кога извршниот одбор на ММФ се состанува за да ги разгледа економските перформанси на Украина со заем од 15,6 милијарди долари.
Одборот се очекува да одобри исплата на дополнителни 900 милиони долари за поддршка на буџетските потреби на Украина.
Зеленски е поканет да им се обрати на американските сенатори утре (вторник) во 9 часот наутро, локално време, изјави во неделата помошник на раководството на Сенатот.
Иако нема да се обрати пред Претставничкиот дом на САД, Зеленски ќе се сретне со претседателот на Претставничкиот дом Мајк Џонсон, изјави портпаролот на Џонсон Раџ Шах во имејл до Ројтерс.
Во попладневните часови, Зеленски ќе се сретне со Бајден за да разговара за она што Белата куќа го нарекува „итни потреби“ со кои се соочува Украина во нејзината тековна војна против руската инвазија.
Состанокот доаѓа во време кога Белата куќа се обидува да постигне договор со Конгресот да обезбеди воена помош за Украина и Израел.
По нивната средба, двајцата лидери ќе одржат заедничка прес-конференција во Белата куќа.
