Руската централна банка денеска треба да одржи итен состанок, бидејќи вредноста на валутата на земјата, рубљата, паѓа на светските пазари.
Во понеделникот рубљата го достигна најниското ниво од почетокот на воената кампања во Украина. Вредноста на рубљата се намали за околу 30 отсто од почетокот на годината.
„Нестабилноста на националната валута нема да има добро влијание на животот. Најверојатно, тоа ќе ги погоди обичните луѓе, бидејќи сигурно ќе следи поскапување за се. Ќе почекаме и ќе видиме“, вели Дина Соловјова, ветеринар.
„Цените ќе растат, што значи дека животниот стандард ќе падне. Тој животниот стандард веќе падна, и уште повеќе ќе паѓа. Има сè повеќе сиромашни луѓе, тоа е сигурно“, вели Владимир Бесоседни, пензиониран учител.
Во една статија напишана за владината медиумска организација Тасс во понеделникот, помошникот на претседателот на Кремљ, Максим Орешкин, призна дека падот на вредноста на рубљата е предизвик, но тврдеше дека вредноста на валутата брзо ќе закрепне.
Русија, исто така, откри дека билансот на тековната сметка на земјата, кој ја следи релативната вредност на стоките и услугите извезени од и увезени во земјата, паднал на 5,4 милијарди долари во вториот квартал од годината, што е пад од 93 отсто на годишно ниво.
Намалувањето на бројот, што укажува на значителен пад на извозот, е лош знак за економијата која во голема мера се потпира на извозот на стоки како што се фосилните горива и житото.