Набљудувачите на Обединетите нации забележаа нагло зголемување на цивилните жртви во Украина минатиот месец, како што руските сили ги засилија нападите, соопшти денес Канцеларијата на ОН за човекови права.
Бројот вклучува најмалку 57 деца убиени или повредени во март, двојно повеќе од бројот во февруари, се вели во извештајот.
Набљудувачката мисија на ОН за човекови права верификуваше најмалку 604 цивили убиени или повредени во Украина во март, што претставува зголемување од 20 отсто во однос на февруари.
„Зголемувањето на цивилните жртви во март главно се должи на нападите на руските вооружени сили со користење на проектили и муниција низ Украина и зголемените воздушни бомбардирања во близина на линијата на фронтот“, соопшти Канцеларијата за човекови права.
Мисијата откри дека повеќето цивилни жртви - 93,5 отсто - како и најголемата штета на образовните и здравствените установи и на критичната инфраструктура, се случиле во областите контролирани од владата.
Украина претрпе особено тешки напади минатиот месец, а претседателот Володимир Зеленски рече дека земјата може да остане без ракети за противвоздушна одбрана доколку Русија продолжи со својата интензивна кампања за бомбардирање со долг дострел.
Тој минатата недела рече дека Русија само во март истрелала над 3.000 воздушни бомби, 600 дронови и 400 проектили врз Украина.
