И покрај контроверзната природа на многу од одлуките за помилувања на претседателот Доналд Трамп, вклучувајќи ја и најновата за Мајкл Флин, Трамп имал многу помалку помилувања од неговите претходници изминатиов век, објави истражувачкиот центар „Пју“.
Според истражувачкиот центар, кој користел податоци од Одделот за правда, Трамп издал 29 решенија за помилувања, меѓу кои и на Флин, вклучувајќи и 16 одлуки за намалување на казни, откако ја презел функцијата во 2017 година.
За разлика од него, поранешниот претседател Барак Обама издал 212 решенија за помилувања, и 1.715 за намалување на казни, за време на осум години функција.
Претседателот Џорџ Х. Буш имал 74 помилувања, но, само три намалувања на казни за време на неговиот четиригодишен мандат.
Вчера, претседателот Трамп го помилуваше Мајкл Флин, кој призна вина за лажење на Федералното истражно биро (ФБИ) во 2017 година, за серија разговори кои ги имал со тогашниот руски амбасадор во Вашингтон, околу санкциите на администрацијата на Обама за време на претседателската транзиција во 2016 година.
„Му честитам на Флин и на неговото прекрасно семејство. Знам дека ќе имате навистина одличен Ден на благодарноста“, напиша Трамп на Твитер.
Според истражувањето на „Пју“, бројот на помилувања од страна на Трамп најверојатно ќе се зголеми во последните два месеца од неговото претседателство.
Facebook Forum