Во напад со руско беспилотно летало врз Киев биле ранети три лица, од кои две биле хоспитализирани, соопштија денес властите во главниот град на Украина.
Паѓањето на остатоци од уништено беспилотно летало оштетило зграда, изјави градоначалникот Виталиј Кличко на својот канал за пораки Телеграм.
Сергеј Попко, шеф на воената администрација на Киев, изјави дека во средата по полноќ во градот оперирале единици за противвоздушна одбрана.
Украинската војска соопшти дека нејзината противвоздушна одбрана соборила 36 од 89 руски беспилотни летала лансирани во текот на ноќта.
Војската соопшти дека изгубила трага од 48 дронови, а уште пет ја напуштиле територијата на Украина за Русија и Белорусија.
Нападите доаѓаат откако Русија во вторникот лансираше рекорден број беспилотни летала насочени кон Украина, прекинувајќи ја струјата во поголемиот дел од западниот регион Тернопољ и оштетувајќи ги станбените згради во регионот на Киев.
Русија денес ги предупреди САД да ја запрат, како што ја нарече, „спиралата на ескалација“ околу Украина, но рече дека ќе продолжи да го информира Вашингтон за пробните лансирања на ракети со цел да се избегнат „опасни грешки“.
Украинскиот претседател Володимир Зеленски рече дека руската употреба на новата ракета - за која Киев рече дека достигнала брзина од 13.600 км на час - претставува „јасна и тешка ескалација“ во војната и повика на силна светска осуда.
Војската на САД соопшти дека ракетата била експериментална и дека Русија најверојатно поседувала само неколку од нив.
