Мексико, Канада и Кина - клучните трговски партнери на САД - веќе го чувствуваат влијанието, додека глобалната загриженост продолжува да расте.
„Мексико и Канада се клучни трговски партнери, така што заканата од царини е без преседан“, вели Алфредо Карило Обрегон од институтот Като.
Администрацијата на Трамп воведе царини од 25 отсто на увозот од Мексико и Канада, освен за одредени канадски енергетски производи, кои се соочуваат со царина од 10 отсто. Претходно, веќе важеа посебни царини за челик и алуминиум од овие земји.
„Тие ни наплаќаат тарифи со години. Време е да бидеме реципрочни“, рече американскиот претседател Доналд Трамп.
Овие тарифи имаат за цел да се спротивстават на нефер трговските практики и да го вратат производството во САД, но експертите предупредуваат дека најголемото влијание ќе го почувствуваат индустриите зависни од прекуграничната трговија.
Автомобилскиот сектор е на врвот на листата. Мексико и Канада го снабдуваат најголемиот дел од американските моторни возила и делови, а исто така се меѓу најголемите купувачи на американскиот извоз на автомобили.
„Автоделовите ги минуваат границите на САД, Мексико и Канада седум до осум пати пред да се склопат во возилото“, додава Обрегон.
Земјоделскиот сектор, исто така, може да биде погоден. Над половина од увозот на овошје и зеленчук во САД доаѓа од Мексико.
„90 проценти од авокадото што се консумира во САД е увезено од Мексико“, додава тој.
Енергијата исто така. Во 2023 година, Канада и Мексико обезбедиле над 71% од увозот на сурова нафта во САД, а само Канада учествувала со речиси 60%.
Царините за Кина најмногу ги погодија електрониката и производите за широка потрошувачка - мобилните телефони, компјутерите и многу повеќе.
„Новите правила ги укинаа царинските ослободувања за стоки за е-трговија како што се Тему и Шејн. Домашните производители ќе имаат добивка, но тоа е голем удар за увозниците“, вели Камерон Џонсон од Тидалвејв Солушан.
Индустриите и потрошувачите внимателно следат што се случува. Останува прашањето: Дали овие тарифи ќе создадат нови работни места или едноставно само ќе ги зголемат трошоците за потрошувачите?
Facebook Forum