Тридневниот прекин на огнот меѓу завојуваните страни на Судан стапи на сила во вторникот по, како што САД го нарекоа „интензивни преговори“.
И суданските вооружени сили (САФ) и Силите за брза поддршка (РСФ) јавно ветија дека ќе го почитуваат прекинот на огнот.
„За да се поддржи траен крај на борбите, Соединетите Држави ќе се координираат со регионалните и меѓународните партнери и суданските цивилни чинители, за да помогнат во создавањето на комитет кој ќе ги надгледува преговорите, склучувањето и спроведувањето на постојан прекин на непријателствата и хуманитарни аранжмани во Судан“, се вели во соопштението на американскиот државен секретар Антони Блинкен.
Светската здравствена организација предупреди на „огромен биолошки ризик“ откако една од страните во суданскиот конфликт окупираше лабораторија која содржи патогени за мали сипаници и колера и други опасни материјали.
Нима Саед Абид, претставник на СЗО во Судан, не прецизираше за која страна станува збор, но им рече на новинарите дека ситуацијата е „екстремно опасна“.
„Ова е главната грижа: нема пристап до лабораториските техничари да одат во лабораторија и безбедно да ги содржат достапните биолошки материјали и супстанции“, рече тој.
Најмалку 427 луѓе се убиени, а повеќе од 3.700 се ранети, според агенциите на ОН, од почетокот на борбите на 15 април.
Генералниот секретар на ОН, Антонио Гутереш во понеделникот ги повика членките на Советот за безбедност на ОН „да вложат максимално влијание со страните за да се стави крај на насилството, да се врати редот и да се вратат на патот на демократската транзиција“.
Советот за безбедност во вторник треба да одржи состанок за Судан.
Гутереш, исто така, рече дека ОН не го напуштаат Судан, но привремено преместиле „стотици“ вработени во и надвор од земјата.
Среде борбите, земјите побрзаа да ги евакуираат своите дипломати и граѓани.
Канада, Египет, Франција, Германија, Италија, Шведска, Украина и Соединетите држави се меѓу државите кои користат авиони и конвои за да ги изнесат странските државјани надвор од земјата.
Поголемиот дел од персоналот на американската влада кој го евакуираше суданскиот главен град Картум, пристигна во понеделникот попладне во Вашингтон.
Британското Министерство за надворешни работи соопшти дека во вторникот започнала евакуација со летови кои заминуваат од аеродромот надвор од Картум.
Кинеското Министерство за надворешни работи во вторникот соопшти дека повеќето нејзини државјани се безбедно евакуирани.
Суданските државјани се грижат поради прекинот со снабдување со струја и немањето на интернет услуга.
Некои Суданци донеле одлука да избегаат со автомобили и автобуси по опасните патишта.
Некои информации за овој извештај се користени од Асошиетед прес, агенцијата Франс прес и Ројтерс.
