Демократските и републиканските лидери на американскиот Сенат изразија поддршка за продолжување на помошта за Украина денес, кога законодавците се вратија во Вашингтон, соочени со кус рок за усвојување на легислативата за трошоци.
Претседателот на САД Џо Бајден минатиот месец побара од Конгресот да одобри околу 40 милијарди долари дополнителни трошоци, вклучително и 24 милијарди долари за Украина и други меѓународни потреби, како тест за подготвеноста на земјата да продолжи да ја поддржува Украина додека се бори против Русија.
„Ние, исто така, мора да продолжиме да стоиме со нашите пријатели во Украина, сега повеќе од кога било, бидејќи контраофанзивата против силите на Путин е во полн замав“, рече лидерот на демократското мнозинство во Сенатот Чак Шумер, во изјавата за отворање на Сенатот по паузата во август.
„Главниот приоритет на Сенатот мора да биде безбедноста на американскиот народ“.
Советникот за национална безбедност на Бајден Џејк Саливан, претходно денес им рече на новинарите во Белата куќа дека администрацијата тесно соработува и со Сенатот и со Претставничкиот дом на дополнителниот пакет помош, кој бара финансирање до крајот на 2023 година.
Саливан рече дека администрацијата верува дека ќе може да ги обезбеди потребните финансии.
„Разговорите беа конструктивни, тие беа позитивни, беа суштински и очекуваме дека ќе успееме да постигнеме здрав пакет за Украина да го добие она што ѝ треба“, рече тој.
Изгледите за дополнителното барање на Бајден би можеле да бидат помалку оптимистички во Претставничкиот дом, каде што републиканците имаат мало мнозинство, а некои од екстремната десница, особено оние кои се најтесни сојузници со поранешниот републикански претседател Доналд Трамп, го критикуваат американското финансирање за Киев.
Барањето на Бајден за помош за Украина доаѓа во време кога законодавците се соочуваат со краен рок на 1 октомври да го усвојат барем краткорочниот предлог-закон за трошење или ќе се соочат со затворање на владата.
