Како ќе изгледа учебната година во Северна Македонија?

На помалку од еден месец од стартот на новата учебна година, надлежните се уверени дека образовниот систем ќе покаже дека има капацитет да обезбеди непречена и квалитетна настава во услови на коронакриза.

За неодамна усвоениот владини план 2020/2021, кој меѓудругото предвидува настава со физичко присуство за децата од прво, второ и трето одделение, со можност за ваква настава и за останатите основци и средношколци ако условите тоа го дозволуваат, денеска се дебатираше меѓу ресорното министерство и првите луѓе на општините во земјава.

„Ширината на овој план дава можности и затоа из борувавме со градоначалниците – сите заеднички и наставниците, и директорите, родителите и учениците заеднички можеме да создадеме квалитетна настава во годината 2020/2021“, вели Министерката за образование, Мила Царовска.

Општините имаат рок до 10 септември да го известат министертсвото за образование дали и кои училишта, покрај прво, второ и трето одделение, можат да почнат со настава со физичко присуство и за учениците од другите одделенија.

„Во тек се тие испитувања за да можеме да настапиме пред министерството за образование за да добиеме и одборение од комисијата за здравство за почеток на настава со физичко присуство, онаму каде нема услови ќе оди онлајн настава“, вели градоначалникот на Скопје и претседател на ЗЕЛС, Петре Шилегов.

Во делот на онлајн настава во фаза на тестирање е платформата која веќе и била презентирана на Царовска.

„Таа треба да биде едноставна за употреба и веднаш штом биде финализирана таа ќе биде презентирана за што е можно повеќе граѓани да имаат слика за таа платформа“, вели Царовска.

Владиниот план предвидува наставниот час во основните училишта да трае 30 минути, а во средните 35.

Проверката на знаењето на сите ученици ќе се врши со нивно физичко присуство во училиштата кои по повеќе од пола година пауза на 1 октомври ќе ги отворат вратите.