Рускиот суд денес изрече казна од 32.000 долари за Гугл затоа што не избришал наводно лажни информации за конфликтот во Украина.
Потегот на судот следи по слични дејствија на почетокот на август против Епл и Фондацијата Викимедија, која е домаќин на Википедија.
Според руските вести, судот утврдил дека Јутјуб, кој е во сопственост на Гугл, е виновен за небришење видеа со неточни информации за конфликтот, што Русија го карактеризира како „специјална воена операција“.
Гугл, исто така, беше прогласен за виновен за неотстранување видеа што сугерираа начини за влегување во установи кои не се отворени за малолетници, рекоа новинските агенции, без да прецизираат за какви објекти станува збор.
Откако испрати војници во Украина во февруари 2022 година, Русија донесе низа мерки за казнување на секоја критика или преиспитување на воената кампања.
Некои критичари добија тешки казни. Опозиционерот Владимир Кара-Мурза годинава беше осуден на 25 години затвор за предавство што произлегува од говорите што ги одржа против дејствијата на Русија во Украина.
