Ирачки борбени авиони доцна синоќа извршија напади врз градот Тикрит против сунитските милитанти коишто објавија дека формирале исламска држава во области на Ирак и Сирија.
Борбата за Тикрит продолжи и денес. Градот е еден од неколкуте каде милитантите на Исламската држава Ирак и Левант (ИСИЛ) презедоа контрола за време на офанзивата што започна во јуни.
Вчера, ИСИЛ објави аудио-снимка во којашто соопштува дека нејзиниот командант, Абу Бакр ал-Багдади, е водач на новиот калифат. ИСИЛ своевремено беше поврзан со Ал-Каида во Ирак, но Ал-Каида порано годинава се одрекна од ИСИЛ поради намерата да создаде калифат и одбивањето да ги почитува наредбите.
САД порано месецов испратија 300 војници во Ирак да дадат поддршка на владините сили за безбедност и да помогнат да се формираат заеднички оперативни центри против напредувањето на сунитските милитанти. Американските советници воедно управуваат со вооружени беспилотни летала за да го заштитат американскиот персонал.