Десетици демократски законодавци го повикаа американскиот претседател Џо Бајден да ги покрене прашањата за човековите права со индискиот премиер Нарендра Моди за време на неговата посета на Вашингтон оваа недела, се вели во писмото испратено до Бајден.
Моди дојде во Вашингтон денес во посета проектирана како пресвртница во врските меѓу двете земји.
Американските законодавци рекоа дека се загрижени за верската нетолеранција, слободата на печатот, пристапот до интернет и таргетирањето на групите на граѓанското општество.
„Ние не поддржуваме ниту еден конкретен индиски лидер или политичка партија - тоа е одлука на народот на Индија - но ние стоиме во поддршка на важните принципи кои треба да бидат суштински дел од американската надворешна политика“, се вели во писмото од сенаторот Крис Ван Холен и конгресменката Прамила Џајапал.
Вкупно 75 демократски сенатори и членови на Претставничкиот дом го потпишаа писмото, испратено до Белата куќа денес и првпат објавено од Ројтерс.
„И бараме, за време на вашата средба со премиерот Моди, да разговарате за целиот спектар на прашања важни за успешна, силна и долгорочна врска меѓу нашите две големи земји“, се вели во писмото.
Моди беше во САД петпати откако стана премиер во 2014 година, но ова патување ќе биде негово прво со целосен дипломатски статус на државна посета, и покрај загриженоста за она што се смета за влошена ситуација со човековите права.
Вашингтон се надева на поблиски врски со најголемата демократија во светот, која ја гледа како противтежа на Кина, но поборниците за права се загрижени дека геополитиката ќе ги засени прашањата за човековите права.
Неколку американски групи за права планираат протести за време на посетата на Моди.
Во годишниот извештај на Стејт департментот за практиките на човековите права објавен во март се наведени „значајни прашања за човековите права“ и злоупотреби во Индија.
Моди ќе се обрати на заедничкиот состанок на Претставничкиот дом и Сенатот в четврток, една од највисоките почести што Вашингтон им ги дава на странските лидери.
„Серијата независни, веродостојни извештаи ги рефлектираат вознемирувачките знаци во Индија кон намалувањето на политичкиот простор, порастот на верската нетолеранција, таргетирањето на граѓанските организации и новинарите и растечките ограничувања на слободата на печатот и пристапот до интернет“, рекоа законодавците.
Тие велат дека му се придружиле на Бајден во пречекот на Моди во САД и сакаат „блиски и топли односи“ меѓу луѓето на двете земји, велејќи дека пријателството треба да се заснова на заеднички вредности и дека „пријателите можат и треба да разговараат за нивните разлики на чесен и искрен начин“.
„Затоа со почит бараме, покрај многуте области на заеднички интереси меѓу Индија и САД, да ги поставите директно со премиерот Моди областите на загриженост“, се вели во писмото.
Говорејќи со новинарите пред да пристигне Моди во Вашингтон, портпаролот на Белата куќа за национална безбедност Џон Кирби одби да коментира дали Бајден ќе го покрене ова прашање, но дека е „вообичаено“ Бајден да изразува загриженост за човековите права.
Извор: Ројтерс
