Американскиот претседател Џо Бајден треба да ја посети Германија в петок, откако ја откажа посетата минатата недела поради ураганот Милтон што ги погоди САД, изјавија за Ројтерс во недела извори од германската Влада.
Магазинот „Шпигел“ претходно го објави новиот датум, велејќи дека плановите за состаноци се веќе добро напреднати.
Изворите рекоа дека посетата на Бајден нема да има карактер на формална државна посета.
„Шпигел“ објави дека официјалните средби со канцеларот Олаф Шолц и претседателот Франк-Валтер Штајнмаер биле на агендата за следниот петок.
Разговорите ќе се однесуваат на војните во Украина и на Блискиот Исток, се вели во извештајот.
Откажувањето на првично планираното патување на Бајден ги поништи плановите за поширок состанок на таканаречената Рамштајн група на донатори на оружје од Украина, кој ќе биде дел од неговиот престој во Германија, на кој би се разговарало за можните нови обврски за помош на Украина.
