Група во Ирак поврзана со Ал-Каида презеде одговорност за нападите на бомбаши-самоубијци во Багдад во неделата во кои загинаа најмалку 155 лица, а преку 500 беа повредени.
Милитантната група Исламска држава во Ирак на својата Интернет-страница објави дека стои зад двата напада изведени со автомобили-бомби.
Ирачкиот премиер Нури ал-Малики за нападите ги обвини Ал Каида и членови на поранешната партија Баат. Тој смета дека целта била да создадат нестабилност и да го спречат одржувањето на изборите во јануари.
Речиси истовремените напади се случија близу строго обезбедената „Зелена зона“ во Багдад и судејќи по се` целта била општинска владина зграда и Министерството за правда.
Ирачкото Министерство за внатрешни работи соопшти дека властите уапсиле најмалку 70 лица, но не даде дополнителни детали.
Исламската држава во Ирак презеде одговорност и за нападите во август во близина на владини министерства во Багдад, кога загинаа околу 100 лица.