Линкови за пристапност

Кина, Русија и држави од Централна Азија на шангајски економски самит


Кина, Русија и четири централноазиски држави се согласија да работат заедно на надминување на глобалната економска криза и за зголемување на соработката по финансиски прашања.

Лидерите на Кина, Русија, Казахстан, Киргистан, Таџикистан и Узбекистан во среда се собраа во Пекинг на самит на Шангајската организација за соработка.

Кинескиот премиер Вен Џиабао на државната телевизија кажа дека доколку државите-членки на организацијата работат заедно за продлабочување на соработката, тие ќе бидат во можност да создадат иднина на мир и просперитет за регионот. Тој кажа дека самитот донел согласност за подобрување на соработката во областа на трговијата, енергијата и земјоделството.

Претставници на Индија, Иран, Монголија и Пакистан го следеа самитот како набљудувачи.

Шангајската организација за соработка израсна од регионалните напори од средината на 1990-те за намалување на армиските сили на заедничките граници на земјите учеснички. Организацијата подоцна на својата агенда ги додаде анти-терористичките напори, економската и енергетската соработка.

Регионалната безбедносна група од некои на Запад се гледа како начин да се попречи американското влијание во Централна Азија.

XS
SM
MD
LG