Американскиот претседател ја заврши дводневната посета на Турција со обраќање пред група студенти во кое вети ново поглавје во односите на САД со муслиманите и остатокот од светот.
На средбата во Истанбул Барак Обама повика на поголемо разбирање меѓу земјите и ја повтори американската определба за обнова на односите меѓу САД и муслиманскиот свет. Тој истакна дека САД, како и секоја друга земја, имаат направено грешки.
Обама претходно се сретна со муслимански, христијански и еврејски лидери во Истанбул, а ги посети и Света Софија и Сината џамија.
Турција е последната станица од европската турнеја на американскиот претседател. Тој учествуваше на Самитот на Групата 20 најразвиени економии во Британија, на Самитот на НАТО во Германија и Франција, како и на средбата САД-ЕУ во Чешката Република.