Интервју на македонскиот преговарач Зоран Јолевски за Гласот на Америка на македонски по завршувањето на последната рунда преговори во Њујорк.
Глас на Америка на македонски: Што е најново од последната рунда преговори?
Зоран Јолевски: На состанокот го пренесов ставот на Република Македонија дека би сакала да се најде решение што е побрзо околу разликите за името со Грција, со цел да се обезбеди интегрирање на Македонија во НАТО и ЕУ, иако според Времената спогодба од 1995-та година, ова не би требало да биде пречка.
Но, за да се постигне ова, потребна е спремност и компромис од страна на Грција.
Исто пренесов дека во овој процес е потребно да се заштити интегритетот и достоинството на македонските граѓани кои се посветија на реформите и со постојаното ниво на демократија ги исполнија условите да добијат покана за членство во НАТО.
Глас на Америка на македонски: Со каква позиција настапивте на преговорите?
Зоран Јолевски: На оваа средба не беше отворен последниот предлог на амбасадорот Нимиц, така што не се преговараше за суштински прашања, туку за продолжување на преговорите и начинот како ќе се продолжат. На средбата во Њујорк стана збор и за создавање на добра атмосфера меѓу двете држави, со цел полесно да се најде решение.
Глас на Америка на македонски: Колку време траеше средбата во Њујорк?
Зоран Јолевски: Средбата во канцеларијата на посредникот Метју Нимиц во Њујорк траеше еден час и 40 минути.
Глас на Америка на македонски: Како ја оценувате Вашата прва средба со грчкиот преговарач Василакис?
Зоран Јолевски: Средбата ги постигна зацртаните цели. Се разбира дека ова е процес што ќе потрае, но да се надеваме дека ќе се најде решение на взаемно задоволство на двете страни, при што е неопходно, како што споменав и истакнав на средбата, да се заштити интегритетот и достоинството на македонските граѓани.
Глас на Америка на македонски: Дали амбасадорот Нимиц најави планови за следна средба или дополнително ќе ве информира?
Зоран Јолевски: Дополнително ќе не` информира. Имајќи предвид дека и во Република Македонија и во Грција следуваат избори – во Грција избори за Европскиот парламент, а во Македонија претседателски и локални.
Глас на Америка на македонски: Значи, следната средба се очекува по изборите во Македонија и во Грција?
Зоран Јолевски: Датумот не е дефиниран, но тоа е реалната состојба.
