Глас на Америка: На кој начин новата американска политика би се разликувала во споредба со 8-те години на власт на претседателот Буш, како кон светот, така и кон Македонија?
Никола Груевски: Очигледно е дека
постојат некакви разлики во однос на Ирак и други прашања. Меѓутоа, што се однесува до Македонија, не очекувам
промени. Генерално кажано, САД тешко ги менуваат надворешните политики - не така нагло, особено кога се
работи за стратешки партнерства.
Македонија и САД имаат стратешко партнерство и од досегашното, би рекол
- историско искуство, гледајќи ги надворешните
политики на САД, очигледно е дека тие
не ги менуваат стратешките партнерства преку ноќ, не ги рушат изградените, ниту
пак така лесно ги градат оние што не се изградени - исто така преку ноќ. Значи, не очекувам некоја сериозна промена
во однос на надворешната политика кон нас.
Глас на Америка: Можни ли се промени на американската политика кон
Македонија ако
на изборите победи демократот Барак Обама и неговиот потпретседателски кандидат Џо Бајден, со оглед на наводната
блискост со
грчкото лоби?
Никола Груевски: Не
очекувам драстични промени. Можеби ќе има некоја разлика во нијанси. Меѓутоа, сите кои досега сум ги
сретнал од Стејт департментот и од партиите во САД, велат дека не би
требало да се очекува некоја крупна и сериозна промена. Но, останува да
видиме.
Глас на Америка: Што може да се случи во септември, со оглед на
најавите за нов предлог во врска со името, за време на Генералното собрание на ОН?
Никола Груевски: Ние континуирано се залагаме да се најде некое решение за надминување на проблемот со името. Како што се залагавме во минатото, ќе се залагаме и во септември, а и потоа. Не сме фокусирани дали тоа ќе биде во септември, или октомври. Тоа за нас е крупно и историско прашање и важно е да се заврши на добар начин што за нас ќе биде прифатлив, а не поради тоа што тој месец е годишното собрание на ОН, или пак во октомври има нешто друго. Значи, не го поврзуваме со такви настани.
