Линкови за пристапност

Владата со мерки против поскапувањата на храната


Македонската Влада одлучи да се спротивстави на глобалниот тренд на поскапување на храната. Со конкретни мерки ќе се обиде да го намали ценовниот шок: ќе побара од трговците и производителите да ги намалат цените на лебот, маслото за јадење и млекото за 10 до 15 проценти, ќе пушти пченица од државните резерви поефтина за 20 проценти од пазарната цена и на социјално најзагрозените семејства ќе им додели парична помош.

Ќе се формира комитет составен од економските министри што ќе ги следи цените и ќе разговара со трговците и со производителите. Засега во Владата не знаат каков ќе биде исходот од разговорите:

-Доколку постигнеме согласност тоа ќе се имплементира веднаш. Значи, ние ќе работиме најбрзо што е можно за веднаш да се почувствува ова. Меѓутоа, треба и другата страна да се согласи на ова, зашто практично, во една пазарна економија не можеме со директива да ги наметнеме тие мерки. Потребно е да имаме согласност и од страна на трговците и од страна на производителите, вели вицепремиерот Зоран Ставревски.

За возврат, Владата ќе им гарантира дека во следните шест месеци цената на електричната енергија нема да се зголеми, а производителите ќе можат да набавуваат пченица од стоковите резерви поефтина за 20 проценти од пазарната цена.

Најзагрозените семејства, кои примаат социјална помош од 800 до 2.400 денари ќе добијат и парична помош-по илјада денари во следните три месеци.

- Најзагрозените слоеви на населението, некаде околу 7.000 семејства ќе бидат носители на ваква помош.

Со конкретни задолженија се и Комисијата за заштита на конкуренцијата и Пазарниот инспекторат. Ќе испитуваат дали поскапувањата се реални или тие се резултат на договори меѓу трговците.

По Хрватска и Словенија, Македонија е трета земја од регионот што презема конкретни мерки за справување со глобалниот тренд на поскапување на храната и нафтата.

XS
SM
MD
LG