САД вчера го повикаа Советот за безбедност на Обединетите нации (ОН) „веднаш да гласа“ за да одобри испорака на помош на ОН за северозападна Сирија под контрола на бунтовниците преку повеќе гранични премини од Турција по минатонеделниот смртоносен земјотрес.
Од 2014 година, ОН беа во можност да достават помош до милиони луѓе на кои им е потребна во северозападниот дел на воено разурната Сирија преку Турција под мандат на Советот за безбедност. Но, моментално е ограничено користење само на еден граничен премин.
„Во моментов, секој час е важен“, рече Линда Томас-Гринфилд, амбасадор на САД во ОН, во изјава за Ројтерс. „Луѓето во погодените области сметаат на нас“.
„Не можеме да ги изневериме. Мораме веднаш да гласаме за резолуција за да го послушаме повикот на ОН за овластување дополнителни гранични премини за испорака на хуманитарна помош“, рече таа. „Време е да се движиме со итност и цел“.
Шефот за помош на ОН Мартин Грифитс, кој е во Турција и треба да ја посети Сирија, во саботата изјави за „Скај њуз“ дека ќе побара од Советот за безбедност да одобри пристап до помош преку уште два гранични премина, тврдејќи дека има „многу јасен хуманитарен случај“.
Во четвртокот, генералниот секретар на ОН Антонио Гутереш, се заложи за поголем пристап.
Во 15-члениот Совет за безбедност, Бразил и Швајцарија го преземаат водството во преговарањето за каква било акција поврзана со прашањето за пристапот до сириската хуманитарна помош. Дипломатите рекоа дека сè уште не е циркулирана нацрт-резолуција за да се одобрат повеќе премини.
Бројот на загинати од земјотресот минатата недела во Турција и Сирија надмина 33.000 во неделата. Од досега пријавените 3.500 смртни случаи во Сирија, каде што бројот не е ажуриран два дена, најголемиот дел се случи во северозападниот дел на земјата.
За усвојување на резолуцијата ќе бидат потребни девет гласа „за“ и без вето од Русија, Кина, САД, Велика Британија или Франција. Сирискиот сојузник Русија рече дека постојниот мандат на Советот за единствен граничен премин е доволен.
Сириската влада смета дека испораките на помош преку нејзината граница без нејзино одобрение е кршење на суверенитетот. Во петокот, таа одобри испораки на помош низ првите линии.
Но, ОН вчера соопштија дека помошта за земјотресот од деловите на Сирија кои се контролирани од владата во северозападниот дел на земјата е запрена.
Амбасадорите на Бразил и Швајцарија во петокот рекоа дека сакаат Грифитс да го информира Советот за безбедност пред да се разговара за каква било акција. Дипломатите рекоа дека Грифитс најверојатно ќе разговара со него в понеделник.
Грифитс вчера го посети единствениот турски граничен премин што ОН во моментов се овластени да го користат за доставување помош во северозападна Сирија, каде на околу 4 милиони луѓе им требаше помош пред земјотресот да го погоди регионот.
„Досега ги изневерувавме луѓето во северозападна Сирија“, рече Грифитс во објавата на Твитер.
Извор: Ројтерс
