Американскиот претседател Џо Бајден повика на смиреност, еден ден пред полициските власти во Мемфис, Тенеси, да ја објават снимката од камера од бруталното претепување на Тајр Николс, 29-годишен Афроамериканец од пет полицајци. „Гневот е разбирлив, но насилството никогаш не е прифатливо“, рече Бајден во изјавата.
„Смртта на Тир е болен потсетник дека мораме да направиме повеќе за да се осигуриме дека нашиот кривично-правен систем го исполнува ветувањето за правична и непристрасна правда, еднаков третман и достоинство за сите“, рече тој.
Мемфис и други градови во САД се подготвуваат за можни протести.
Неколку десетици поддржувачи им се придружија на мајката и очувот на Тир Николс синоќа во Мемфис, Тенеси на бдение со свеќи и молитва.
„Не сакаме да ги запалиме нашите градови, да има немири по улиците. Затоа што мојот син не се залагаше за тоа. И ако сте тука за мене и Тир, тогаш мирно ќе протестирате„, рече мајката на Тир.
Николс почина три дена по претепувањето од полицајците.
Џим Стрикленд, градоначалникот на Мемфис, рече: „Транспарентноста и брзата, методична акција беа наши врвни приоритети бидејќи семејството на г-дин Николс и нашите граѓани не заслужуваат ништо помалку. Постапките на овие полицајци беа ужасни и никој, вклучително и органите на редот, не е над законот. Ве уверувам , ќе направиме сè што можеме за да спречиме повторно да се случи овој вид одвратен чин“.
Полицајците, сите Афро-американци, се обвинети за убиство од втор степен, тежок напад, киднапирање, службено недолично однесување и службено угнетување.
Сите полицајци се отпуштени.
Обвинетите полицајци велат дека го запреле Николс поради несовесно возење.