Русија и САД во петокот соопштија дека се подготвени да разговараат за размена на затвореници, еден ден откако рускиот суд ја осуди кошаркарската ѕвезда Бритни Гринер на девет години затвор за прекршок за дрога, пренесе Ројтерс.
Според Агенцијата, Случајот против Гринер, двократна олимписка освојувачка на златен медал и ѕвезда на Женската Национална кошаркарска асоцијација (ВНБА), ја втурна во геополитички вртлог откако Русија испрати војници во Украина на 24 февруари.
Рускиот министер за надворешни работи Сергеј Лавров изјави дека претседателот Владимир Путин и американскиот претседател Џо Бајден претходно се договориле за дипломатски канал што треба да се користи за да се разговара за потенцијална размена на затвореници.
Подготвени сме да разговараме на оваа тема, но во рамките на каналот што го договорија претседателите Путин и Бајден“, рече Лавров за време на посетата на Камбоџа. „Ако Американците решат уште еднаш да прибегнат кон јавна дипломатија... тоа е нивна работа и дури би рекол дека тоа е нивен проблем“, изјави Лавров.
Американскиот државен секретар Антони Блинкен рече дека Вашингтон е подготвен да се ангажира со Москва преку воспоставените дипломатски канали.
Казната на Гринер - која претседателот Бајден ја нарече „неприфатлива“ - може да го отвори патот за размена на затвореници што ќе ги вклучи 31-годишниот спортист и поранешен руски трговец со оружје кој отслужува 25-годишна затворска казна во САД.
САД веќе дадоа, како што го нарече Блинкен „суштинска понуда“ за да се обезбеди ослободување на Американците притворени во Русија, вклучително и Гринер и поранешниот маринец Пол Вилан.
Портпаролот за национална безбедност на Белата куќа, Џон Кирби, по изрекувањето на пресудата на Гринер изјави дека САД и дале на Русија сериозен предлог. Ги повикуваме да го прифатат тоа“, рече тој.
Кирби не даде дополнителни детали за понудата на САД.
