Џамал Кашоги, саудискиот новинар што беше брутално убиен во конзултатот на Саудиска Арабија во Истанбул е меѓу лицата прогласени за Личности на годината од страна на магазинот „Тајм“.
Изборот вообичаено се однесува на лице или група лица што биле светска тема и што имале влијание врз глобални настани. Годинава, како што објаснуваат од „Тајм“ изборот паднал на „борците за вистината“.
Покрај Кашоги, за Личности на годината се прогласени и луѓето од магазинот „Капитал Газета“ од Анаполис, Мериленд. Петмина од тимот на овој магазин беа убиени во напад што во јуни се случи во просториите на медиумот.
Чест ѝ е дадена и на новинарката од Филипини, Марија Реса, што беше уапсена под обвинение за даночно затајување, како и на новинарите на „Ројтерс“, Ва Лоне и Куа Сое О, кои речиси една година беа во затвор во Мијанмар.
Магазинот „Тајм“ во известувањето за изборот ги додаде и статистиките од Комитетот за заштита на новинарите. Според податоците, 262 новинари во 2017 година завршиле во затвор. Се стравува дека таа бројка годинава ќе биде поголема.