Првиот голем настан од кампањата за претседателските избори во САД во 2024 година ќе се одржи в среда, кога кандидатите на Републиканската партија ќе се сретнат на дебата во градот Милвоки, Висконсин.
Девет кандидати се квалификуваа според правилата на Републиканската партија да бидат дел од дебатата, додека убедливиот фаворит, поранешниот претседател Доналд Трамп, вели дека ќе го прескокне настанот.
Малкумина од учесниците отворено го критикуваа Трамп. Исклучок е поранешниот гувернер на Њу Џерси Крис Кристи. Други, како што е гувернерот на Флорида Рон ДеСантис, кој е на второ место по Трамп, и поранешната гувернерка на Јужна Каролина Ники Хејли, зазедоа поодмерен пристап, надевајќи се дека ќе ја убедат партиската база која останува лојална на Трамп дека можат да ја спроведат десничарската агенда на поранешниот претседателот.
Потоа, тука е поранешниот потпретседател на Трамп Мајк Пенс, кој го брани своето потврдување на резултатите од изборите во 2020 година против желбите на Трамп.
Тој сè уште е со ниска едноцифрена бројка во повеќето анкети на потенцијалните републикански гласачи во 2024 година. Покрај Пенс, Кристи, Де Сантис и Хејли, други кои се квалификуваа за настанот, според Републиканскиот национален комитет, се бизнисменот од Охајо Вивек Рамасвами, сенаторот од Јужна Каролина Тим Скот, гувернерот на Северна Дакота Даг Бургум и поранешниот гувернер на Арканзас Аса Хачинсон.
Еден од оние кои не успеаја да се квалификуваат е Вил Херд, поранешен конгресмен од Тексас и еден од ретките критичари на Трамп во трката, кој вели дека „недостатокот на транспарентност и конфузија околу барањата за дебата се спротивни на демократскиот процес“.
Двајца други кандидати дисквалификувани од дебатната фаза во средата се Лери Елдер и Пери Џонсон, кои велат дека ќе поднесат тужби против Републиканскиот национален комитет.
Трамп во неделата објави на својата платформа за социјални медиуми Truth Social дека поради неговото огромно водство во анкетите и неговите познати достигнувања за време на неговиот мандат како претседател дека нема да учествува на дебатите.
Трамп, наводно, мислел на првите две дебати од прелиминарните избори, кои ќе ги емитува Фокс њуз, вклучувајќи го и соочувањето следниот месец во Калифорнија, оставајќи ја отворена можноста дека е подготвен да се соочи со републиканските ривали на сцената подоцна во сезоната на кампањата.
Поранешниот претседател неодамна стана критички настроен кон Фокс њуз, која се залагаше за неговата кандидатура на последните два претседателски избора.
Но, медиумската империја на магнатот Руперт Мардок, која е сопственик на Фокс њуз, зазеде поодмерен пристап кон Трамп среде сегашното преполно поле на републикански претенденти.
Трамп, исто така, изјави дека нема да го потпише „заветот за лојалност“, кој бара од сите првични губитници на крајот да го поддржат номинираниот, еден од условите за учество во дебатата во Милвоки.
Дури и без Трамп да учествува во дебатата, се очекува разговорот на настанот да биде главно за него, вклучувајќи ги и повеќето од 90 обвиненија за кривични дела со кои тој се соочува за наводни злосторства извршени пред, за време и по неговото претседателствување.
Дебатата нема да биде многу значајна за Трамп - тој сепак ќе биде фаворит без оглед на тоа што ќе се случи. Но, за другите, може да има вирален момент, добар или лош, кој значително ги менува нивните анкетни бројки.
„Мислам дека ДеСантис има најмногу што да загуби. Вивек Рамасвами веројатно има најмногу да добие. Има многу луѓе кои доаѓаат за него“, изјави првиот портпарол на Трамп во Белата куќа Шон Спајсер за Гласот на Америка пред дебатата.
Првата дебата на Републиканската партија, исто така, го става во центарот на вниманието Висконсин, една од ретките сојузни држави што се очекува да обезбеди вистински натпревар меѓу двете големи партии на претседателските избори следната година.
Милвоки ќе биде домаќин на конвенцијата за номинација на Републиканската партија следниот јули.
Четири од последните шест претседателски избори се решени со помалку од процентен поен во Висконсин.
Трамп тесно победи во оваа сојузна држава во 2016 година, пред да загуби со слична разлика од Бајден четири години подоцна.