Претседателот на САД Џо Бајден денес издаде извршна наредба со која бара федералните агенции да го засилат спроведувањето на двопартискиот закон за контрола на оружјето, што тој го потпиша пред девет месеци, а со кој се прошируваат проверките на купувачите на оружје и се зајакнуваат правилата што дозволуваат привремено отстранување на огнено оружје од потенцијално опасно лице.
Законот за побезбедни заедници од 2022 година ги проширува проверките на лицата помлади од 21 година и ја сузбива меѓудржавната трговија со оружје.
Исто така, тој предвидува и федерално финансирање за сојузните држави за да ги спроведат таканаречените закони со црвено знаме, со кои им се забранува на осудените домашни насилници да купуваат огнено оружје. Законот предвидува и повеќе владини пари за програми за интервенција при насилство и услуги за ментално здравје.
Бајден зборуваше за неговите напори за спречување на насилството со оружје во Монтереј Парк, Калифорнија, каде што лице пукаше во сала за танцување за време на прославата на кинеската нова година на 21 јануари, при што уби 11 лица, а рани девет други.
„Трагедија што ја прободе душата на оваа нација, овде во Монтереј Парк, срцето на азиско-американската заедница“, рече Бајден.
Извршната наредба на Бајден вклучува директиви за справување со зголемувањето на огненото оружје украдено при транзит, спроведување и зголемување на јавната свест за законите за безбедно складирање и подобрување на координацијата меѓу агенциите и известувањето на базата за податоци, со цел да помогне во истрагите за убиства со оружје.
„Мојата извршна наредба го упатува мојот државен обвинител да ги преземе сите можни законски дејствија за да нè придвижи што е можно поблиску до универзални проверки на позадината без ново законодавство“, рече Бајден.
Тој ги повика и законодавците да преземат дополнителни дејствија со кои се задолжуваат универзални проверки, како и да се елиминира законодавството што ја штити од тужби индустријата за огнено оружје.
Сепак, изгледите за дополнително законодавство за оружјето се мали според Претставничкиот дом под контрола на републиканците.
Активистите велат дека Бајден треба да направи повеќе за да ги искористи своите извршни овластувања, вклучително и назначување лице кое ќе ги координира федералните одговори при насилство со оружје.
САД имаат некои од најслабите закони за оружје во споредба со другите индустриски развиени земји, како и најмногу оружје во светот – 390 милиони или 1,2 пиштоли по глава на жител.
Околу 43.000 Американци годишно умираат од вооружено насилство, или повеќе од 116 луѓе во просек секој ден.