„Во најтешката криза по Втората светска војна нашата основна цел е држвата, граѓаните, бизнисот да се задржат, да функционираат и да растат. Ова е ужасно тешка ситуација, но нема правдање и јас тоа нема да го правам. Овие есен, зима и пролет се најтешки во повоената македонска држава и ние тоа ќе го издржиме“, рече премиерот Димитар Ковачевски, по денешната седница на Советот за безбедност на која се разгледуваа енергетската криза и начините за нејзино надминување.
Ковачевски вели дека план за пребродување на зимата е утврден и дека веќе се работи на негова реализација. Клучно е дека владата планира зголемување на домашното производство на струја за 25 проценти.
Активностите предвидуваат и обезбедување доволни количини на јаглен, мазут, гас за производство на електрична и топлинска енергија, како и набавка на дополнителна електрична енергија.
Овој план, според владата, би значел дека би немало рестрикции за потрошувачите доколку нема испади во системот.
Your browser doesn’t support HTML5
Советот за безбедност расправа за енергетика
„Целта е во најтешкиот период за нас - од 1 октомври до следниот 1 април 2023, на сите македонски граѓани, на сите домаќинства, ученици, студенти, на сите бизниси да им овозможиме најниска цена на електрична и топлинска енергија, по сегашната цена, со ефтина тарифа на струја“, рече Ковачевски.
Ковачевски апелираше до сите, и граѓаните и бизнисите, да штедат електрична енергија зашто ситуацијата, како што рече, е алармантна – цените на светските берзи на струја се екстремно високи. Снабдувањето со топлинска енергија – парно за 55.000 домаќинства во Скопје ќе го преземе државната ЕСМ. За бизнисот државата планира обезбедување струја по цена пониска од берзанските.
И шефот на државата Стево Пендаровски, кој го свика Советот за безбедност, повтори дека претстојните период ќе биде многу тежок.
„Не е тајна дека не очекува тешка зима. Војната во Украина предизвика тектонски пореметувања“, рече тој.
Во обид да се ублажат ефектите од енергетската криза, Скопје и Софија вчера договорија Бугарија од октомври да ѝ испорачува на земјава околу пет гигавати струја дневно за потребите на индустријата по цена која дополнително ќе се утврдува.