Искористете ја можноста да го почнете пристапниот процес со Европската Унија, ѝ порача на Северна Македонија советникот за национална безбедност на Белата куќа Џејк Саливан.
„Откога се приклучи во НАТО, Северна Македонија е силен сојузник. Може да има и важен придонес во ЕУ. Ги охрабруваме нашите пријатели да ја искористат можноста да го почнат пристапниот процес со ЕУ“, напиша на Твитер советникот за национална безбедност на претседателот Џо Бајден.
САД претходно изјавија дека сега гледаат пат за придвижување напред.
„САД ја поздравуваат дискусијата во Северна Македонија за ревидираниот предлог на Европската Унија за почеток на пристапните преговори, признавајќи ја важноста на македонскиот јазик и идентитет. Долго ја поддржуваме иднината на Северна Македонија во ЕУ и сега гледаме пат за придвижување напред“, напиша на Твитер американската амбасадорка во Скопје Кејт Брнз.
По објавување на францускиот предлог, Стејт департментот за Гласот на Америка рече дека САД ги поздравуваат напорите на Франција да постигне успешно решение и остануваат подготвени да играат конструктивна улога во олеснување на компромисот.
„Со оглед на значењето на овој процес за земјите од регионот и за Европа пошироко, се надеваме дека дипломатските напори ќе продолжат, и ќе продолжиме да ја нудиме нашата поддршка онаму каде што е од помош. Ја поздравуваме Франција за нејзините напори да постигне успешно решение за што побрзо започнување на официјалните преговори. Преговорите се` уште се во тек, а ние остануваме подготвени да играме конструктивна улога во олеснувањето на компромисoт“, изјави портпарол на Стејт департментот.
Во неговата изјава се вели дека Северна Македонија и Албанија ги поставиле темелите и оти сега е време да се придвижат напред кон следната фаза во процесот на пристапување.
„САД се силен поддржувач на интеграцијата на Северна Македонија и Албанија во ЕУ. Ние веруваме дека иднината на Западен Балкан е целосно во ЕУ. Процесот на проширување промовира долгорочен мир, стабилност и просперитет во целиот регион“, стои во изјавата, во која се наведува и дека САД ги земаат предвид „многуте изјави на лидерите на ЕУ за важноста на пристапувањето на Северна Македонија и Албанија во ЕУ за зајакнување на безбедноста на Европа, како и за нашата колективна безбедност“.