Не е постигнат консензус на состанокот на министрите за финансии и гувернерите на централните банки на земјите од Г20, кој денес заврши во Индија, бидејќи членките не успеаја да ги премостат своите разлики за руската војна во Украина.
„Сè уште немаме заеднички јазик за руско-украинската војна“, им рече на новинарите индиската министерка за финансии Нирмала Ситараман по дводневниот состанок кој заврши без заедничка изјава.
Наместо тоа, Индија, која е претседател на групата оваа година, го издаде она што се нарекува резиме и исходен документ во кој ги сумираше разговорите и забележа несогласувања.
Според резимето на претседавачот, Кина и Русија се спротивставија на параграфите што се однесуваат на војната во кои се вели дека предизвикува „огромно човечко страдање“ и „ја влошува постојната кршливост во глобалната економија“.
Неуспехот да се постигне договор не беше неочекуван.
Бидејќи војната во Украина е прашање на остри дипломатски разлики, Индија не можеше да создаде усогласен документ на ниту еден од клучните настани на Г20 досега.
Неколку членки на Г20, исто така, ја осудија Русија поради одбивањето да го продолжи договорот за дозволување на критичниот украински извоз на жито преку Црното Море, рече министерката за финансии на Индија на прес-конференција.
„Храната што минува низ Црното Море не требаше да биде запрена или суспендирана“.
Напуштањето на Русија од договорот предизвика стравувања за влијанието врз земјите со ниски приходи во Азија и Африка, каде што високите цени на храната веќе турнаа повеќе луѓе во сиромаштија.
Додека Индија остана главно неутрална за војната во Украина, таа изрази загриженост за влијанието на конфликтот врз земјите во развој.
Таа рече дека нејзиниот приоритет е да се фокусира на потребата да им се помогне на нациите кои се борат со должничката криза во екот на пандемијата на ковид-19 и конфликтот во Украина.
