Украинскиот претседател Володимир Зеленски изрази загриженост поради можноста Доналд Трамп да се врати во Белата куќа и рече дека ги смета за „многу опасни“ тврдењата на поранешниот американски претседател дека би можел да ја запре војната на Украина со Русија за 24 часа.
Во интервју за британски медиум што се емитуваше во петокот, Зеленски го покани поранешниот претседател и фаворит за републиканската претседателска номинација да го посети Киев, под услов Трамп да го исполни своето ветување на начин што може да ја задоволи Украина.
„Доналд Трамп, те поканувам во Украина, во Киев“, рече Зеленски.
„Ако можете да ја запрете војната во текот на 24 часа, мислам дека ќе биде доволно да дојдете“.
Украинскиот лидер изрази загриженост за потенцијалното претседателство на Трамп каде идејата на Трамп за преговарачки мир во Украина може да вклучи Украина да направи големи отстапки за Русија.
„(Трамп) ќе донесува одлуки сам, без... Не зборувам ни за Русија, туку без двете страни, без нас“, рече Зеленски.
„Ако го каже ова јавно, тоа е малку страшно. Сум видел многу, многу жртви, но тоа навистина ме прави малку под стрес“.
Трамп постојано изјавува дека е добро позициониран да преговара за крај на војната што беснее речиси две години, велејќи дека има добри односи и со рускиот и со украинскиот лидер.
Во текот на неговата политичка кариера, Трамп го фалеше рускиот претседател Владимир Путин, вклучително и по инвазијата на Москва на Украина во февруари 2022 година.
За време на предизборниот митинг во Џорџија, само неколку дена откако руските тенкови влегоа во Украина, Трамп го опиша Путин како „паметен“ политички играч и изрази восхит за брзото преземање од страна на Русија на огромното, „големо парче земја“.
Дел од информациите во текстот се од Асошиетед прес, Франс-прес и Ројтерс
