Украинскиот претседател Володимир Зеленски повика на акција во обезбедувањето воена помош на неговата земја, особено системи за противвоздушна одбрана, по ноќните руски воздушни напади за кои украинската војска соопшти дека вклучува 42 проектили и 40 беспилотни летала.
„Ако руските ракети и беспилотните летала „Шахед“ продолжат да ја напаѓаат не само Украина, туку и решителноста на нашите сојузници, тоа ќе претставува глобална дозвола за терор“, рече Зеленски на социјалните мрежи.
„Ни требаат системи за противвоздушна одбрана и друга одбранбена помош, а не само да замижуваме и да водиме долги дискусии“, рече тој.
Зеленски рече дека последните напади биле насочени кон регионите Харков, Киев, Запорожје, Лавов и Одеса.
„Руските терористи уште еднаш ја нападнаа критичната инфраструктура“, рече Зеленски.
Воздухопловните сили на Украина соопштија дека воздушната одбрана на земјата соборила 39 од 40-те беспилотни летала и уништила 18 од 42 проектили.
Украинскиот оператор за електрична мрежа Укренерго рече дека руските напади ги оштетиле нејзините капацитети во пет различни региони.
Олех Синиехубов, регионален гувернер во Харков, рече дека 10 проектили го погодиле градот Харков, при што руските напади насочени кон енергетската инфраструктура ја исфрлиле струјата на повеќе од 200.000 луѓе.
Максим Козицки, регионален гувернер во Лавов, пријави пожари во објект за гас и електрична трафостаница како резултат на нападите.
Гувернерот на Одеса, Олех Кипер, исто така, пријави пожар во енергетска постројка од остатоци од соборени дронови.
Руското Министерство за одбрана во четвртокот објави дека спречил напад на Украина со 12 беспилотни летала насочени кон повеќе региони.
Руското министерство соопшти дека уништило три беспилотни летала над Курск, три над Тамбов, два над Белгород, два над Мордовија и по еден над Брјанск и Липецк.
Украина редовно ги таргетира областите блиску до границата меѓу Украина и Русија, како што се Белгород и Брјанск. Нападите на Мордовија и Тамбов се едни од поретките напади кои погодија многу подлабоко во руска територија.
Мировна конференција
Швајцарија во средата соопшти дека ќе биде домаќин на меѓународна конференција на високо ниво во јуни, чија цел е да се стави крај на двегодишната војна на Русија против Украина, но призна дека Русија најверојатно нема да се приклучи на мировниот процес.
Конференцијата е закажана за 15-16 јуни во одморалиштето Бургенсток крај езерото во близина на Луцерн и може да привлече врвни функционери од десетици земји. Швајцарскиот дневен весник Ној Цирхер Цајтунг објави дека американскиот претседател Џо Бајден, клучнен глобален поддржувач на Украина, може да присуствува, но официјални лица од Белата куќа рекоа дека не е донесена одлука за тоа кои американски претставници може да бидат таму.
Конференцијата следи по планот поставен во последните месеци од Зеленски и швајцарскиот министер за надворешни работи Игнацио Касис. Највисокиот швајцарски дипломат рече дека на конференцијата ќе бидат поканети повеќе од 100 земји.
„Првата земја со која разговаравме, по Украина, се разбира, беше Русија, бидејќи мировниот процес не може да се случи без Русија, дури и ако таа нема да биде таму на првиот состанок“, рече Касис за новинарите.
Рускиот министер за надворешни работи Сергеј Лавров минатата недела предупреди дека какви било преговори за прекин на борбите во Украина би можеле да бидат успешни само ако се земат предвид интересите на Москва. Тој ја нарече швајцарската рунда мировни преговори западна измама за собирање поширока меѓународна поддршка за Киев.
Зеленски во своето секојдневно обраќање во средата рече дека Украина мора да биде способна да го брани својот воздушен простор, својата земја и нејзините патишта како дел од праведен крај на војната.
„Немаме право да направиме грешка во ниту еден од овие аспекти“, рече тој.
„Треба да има „јасна позиција на светот во однос на правичниот крај на оваа војна“, рече украинскиот лидер.
Некои информации за овој извештај дадоа Ројтерс, Асошиетед прес и агенцијата Франс прес.