Линкови за пристапност

Незначително забавување на економскиот растеж на Македонија


Се наведува во годишниот извештај на Светската банка

Економскиот раст на Македонија забави, но незначително, оцени Светската банка во најновиот извештај за 2015-та година. Од оваа институција соопштуваат дека растежот на бруто домашниот производ (БДП) годинава ќе биде 3,2 процента. Порастот, велат од Светската банка би бил поддржан од продолжителните јавни инвестиции и стабилниот извоз поврзан со странските директни инвестиции.

Од банката додаваат дека е поволен фактот што постои намалување на невработеноста во земјата, и сега изнесува 27,3 проценти за првиот квартал од 2015-та. Сепак, долгорочната невработеност кај младите со 47 %, останува една од највисоките стапки се во регионот, веднаш по Косово и Босна и Херцеговина, се вели во најновиот извештај.

Банката наведува дека јавниот долг како дел од БДП се намалил во првата половина на 2015-та, но се очекува повторно да забележи раст, со оглед на фактот што Владата ги зголемила домашните позајмувања.

Приватната потрошувачка и инвестициите забавиле, се наведува во соопштението на банката, по неодамнешните политички случувања. Забележано е значително намалување на трговскиот дефицит во првата половина на 2015-та во услови кога извозот го надминал увозот. Сепак, за истиот период е регистрирано и благо намалување на странските директни инвестиции.

Забележано е и зголемување на јавниот дефицит за 2015-та, откако Владата презентирала дополнителен буџет со повисоки трошоци, особено на трансферите. Додека политичките превирања забавија, во моментов има затишје, се` до одржување на изборите во април 2016-та.

XS
SM
MD
LG