Со показна вежба за пронаоѓање на небото на владиниот авион со кој беше симулиран изгубен контакт, денеска македонскиот воздушен простор влезе под капата на воздухопловното патролирање на НАТО.
Во вежбата учествуваа воени авиони Ф-16 од грчкото воедно воздухопловство од базата во Лариса, како и специјализираниот авион „Авакс“ за радарско известувачки операции, кој долета од Германија.
На показната вежба присуствуваа министри од владата, претставници од дипломатскиот кор, меѓу кои и амбасадорката на САД, Кејт Брнз и грчкиот амбасадор Русос Кундурос.
„Успеавме во најкус временски период да ја завршиме воената интеграција со НАТО и затоа продолжуваме и понатаму да го зголемуваме нашето одбранбено буџетирање, финансирањето на нашите одбранбени способности, но и да го зголемуваме нашиот придонес кон регионалната безбедност. Заедно сме посилни, тоа беше нашето мото, нашата мотивација да станеме членка на НАТО. Денеска можевме да видиме дека таа гаранција и тоа членство значи поголема безбедност и сигурност за сите наши граѓани како на земја, така и во воздух“, рече министерката Шекеринска.
На присутните им се обрати и командантот на Комбинираниот воздухопловен оперативен центар во Торехон, Шпанија, генерал потполковник Фернандо Де Ла Круз Каравака.
„Од 2020 година, кога Северна Македонија официјално пристапи во НАТО, бевте во можност да се прилагодите на НАТО, преку инкорпорирање на многу нови процедури, а сега ги постигнавте резултатите. Мора да се гордеете со вашата работа. Убеден сум дека ќе го одржувате истото ниво на успех во корист на сите земји“, рече генералот Де Ла Круз Каравака.
Како што беше објаснето, преку системот за воздухопловно патролирање, се обезбедува воздушниот простор на земјите членки од алијансата од можни закани како во воздух, така и на копно.
За заштита на македонското небо ќе бидат задолжени авионите од грчкото воено воздухопловство. При евентуална нужност ним би им биле потребни петнаесетина минути за интервенција во македонскиот воздушен простор.
НАТО почна да патролира на македонското небо со авиони Ф-16 и „Авакс“