Сликата „Прегратка“ на Зоран Костовски во Белата куќа од времето на Џорџ Херберт Вокер Буш

50 години од сликарството, на академскиот сликар Зоран Костовски, во Националната опера и балет. Но, повод и за потсетување, за неговата слика до тогашниот претседател Џорџ Херберт Вокер Буш во 1989-та, во времето на поранешна Југославија. Се присетува, во Скопје бил поканет да направи изложба во тогашниот американски Културен центар.

„Имав таму едно 12-13 уметнички слики, кои што беа изработени таа година, нови, уште ги немав ниту фотографирано. На директорот му се допадна една слика. Тоа беше период на претседателски избори и директорот одлучи да ми откупи една слика, и да му ја испрати на претседателот Буш.

Помина месец, два и добив писмо од Белата куќа, ми го донесе поштар, и во ковертот имаше благодарница од претседателот Буш и сопругата Барбара“, открива Костовски.

Глас на Америка: Која е тематиката на сликата, подарок за Џорџ Буш - постариот?

Костовски: Тематиката на сликата е една жена стои исправена, и маж клекнал пред неа и ја гушнал околу половината. Тој ја гледа неа. Една прегратка, меѓу двајца. Меѓу маж и жена. Таа е темата, веројатно, затоа и сликата и се допаднала на сопругата Барбара.

Денес, вели, повеќе твори откако кога бил во работен однос во Македонската опера и Балет, како сценограф, повеќе од 4-ти децении.

„Ние уметниците, еве моите 50 години, имаме разни фази на творештво. На пример, инспирација може да биде жената како убаво битие, која може да го инспирира уметникот. Мотивот за уметникот е неисцрпна работа. Секогаш имам мотиви. Мртва природа, апстракција, пејзаж, македонскиот фолклор, боите на Македонија, црвено, жолто, злато, црно, сиви нијанси, од везовите, од носиите....Нашето поднебје е богато со култура, колку сакаш“, открива сликарот Костовски.

Глас на Америка: Имате ли своја муза?

„Имам, своја муза која ме инспирира, да творам. Се случува наутро во 2 часот по полноќ, да сликам. Времето за уметникот не е одредено. Се случува во 4 наутро да станам и да сликам, додека сите спијат!“, коментира Костовски.

Веројатно, како што вели, првиот и единствен македонски сликар чие дело се наоѓа во Белата куќа, скромно открива дека не сакал тоа да го експонира тој факт во јавноста, и долго време го чувал во себе, како инспирација, но и драг спомен врзан со американскиот претседател Џорџ Херберт Вокер Буш.

Академскиот сликар Зоран Косовски реализирал самостојни изложби во: Скопје, Битола, Охрид, Осиек, Загреб, Нова Горица, како и во Келн и во Ерштад, Германија.